Polísia Identifika Ona Suspeitu Sira Ne’ebé Foti Osan Ofertóriu iha Igreja Becora

Porta-voz Komandu Jerál PNTL, Superintendente Polísia João Belo dos Reis (klaran) halo konferénsia imprensa iha Ministériu Interiór, Kinta (05/02/2026). Imajen/Rafa.tl

DILI, RAFA.tl– Polísia Nasionál Timor-Leste (PNTL)  identifika ona suspeitu sira ne’ebé envolve foti osan ofertóriu iha igreja Parókia Sagrado Coração de Jesus Becora, no aprezenta ona ba Ministériu Públiku hodi hein karta mandadu Tribunál hodi ba kaptura suspeitu sira.

Notísia Relevante: Polísia Buka Tuir Autór Ne’ebé Foti Osan Ofertóriu iha Igreja Becora

Porta-voz Komandu Jerál PNTL, Superintendente Polísia João Belo dos Reis, ba jornalista iha Ministériu Interiór, Kinta (05/02/2026), hateten relasiona ho kazu foti osan ofertóriu iha Igreja Becora ne’e, PNTL halo ona identifikasaun liu husi CCTV ne’ebé iha, no hein mandadu kapturasaun husi Tribunál.

“Identifika ona suspeitu sira  ne’ebé envolve ba kazu ne’e, aprezenta ona ba Ministériu Públiku no  kazu ne’e rejista ona, ami rekolla ona mós CCTV ne’ebé hosi Komandu Polísia Munisípiu Díli rejista no aprezenta ba Ministériu Públiku atu follow-up tuir mai,” Superintendente Polísia João Belo dos Reis hateten.

Superintendente Polísia ne’e hatutan, kona-bá evidénsia sira hanesan Cámera CCTV ne’e, parte Komandu PNTL Munisípiu Díli rekolla ona hodi sai evidénsia.

“CCTV ho sasán sira ne’ebé mak iha relasaun ba kazu ne’e ita rekolla hotu ona, prosesu ita aprezenta ba Ministériu Públiku hein katak delegasaun fó kompeténsia mai sira ne’ebé mak envolve ne’e buka tuir,” Nia informa

Komandante ne’e subliña, kazu foti osan Ofertóriu iha Igreja Parókia Sagrado Coração de Jesus Becora ne’e PNTL nafatin halo vijilánsia no identifikasaun ba autór sira atu sira labele ses husi teritóriu nasionál to’o mandadu husi Tribunál sai hodi halo kapturasaun ba sira tuir lei ne’ebé vigora.

Iha Sábadu-kalan, foin lalais ne’e,  ema na’in-tolu (suspeitu) tama  Igreja Parókia Sagrado Coração de Jesus Becora liuhosi janela hodi ba foti kofre rua iha estátua Nossa Señora nia ain.

Reportajen ekipa Rafa.tl