Polísia Buska Xinés Na’in-18 Tanba Deskonfia Envolve iha Jogu Ilísitu Online

Ministru Interiór, Francisco da Costa Guterres. Imajen/Rafa.tl

DILI, RAFA.tl-Ministru Interiór (MI), Francisco da Costa Guterres, afirma katak ekipa konjunta buska sidadaun Xineza na’in-18 tanba deskonfia envolve iha jogu ilísitu online scamming.

Notísia Relevante: Advogadu ba Xinés Na’in-18 Konsidera Intervensaun Polísia La Tuir Prosedimentu

“Sira halo buska ida ne’ebé maka derrepente tanba  tenke asegura evidénsia sira ne’e lai hodi hato’o ba Ministériu Públiku,” Ministru Interiór Francisco da Costa Guterres hateten ba jornalista sira iha Ministériu Finansas, Díli, Segunda (23/02/2026), hodi hatán ba advogadu privadu ba Xineza na’in-18 ne’ebé konsidera atuasaun Polísia Nasionál Timor-Leste (PNTL) la tuir prosedimentu lei, tanba la aprezenta mandadu buska no apreensaun husi Tribunál.

Francisco da Costa Guterres esplika kona-bá ekipa konjunta asegura sidadaun Xineza na’in-18 ne’e tanba mós deskonfia iha problema liga ho passaporte, viza no mós buat seluk liga ho jogu ilísitu maibé buat hirak ne’e hotu sei iha faze investigasaun.

Ministru Interiór ne’e husu ba públiku atu kontrola mós ba jogu online tanba Governu hasai ona rezolusaun hodi taka jogu online iha rai laran, tanba ne’e bainhira identifika ka deskobre ema balun nafatin loke jogu online, informa lalais ba autoridade seguransa hodi halo atuasaun tuir lei.

Reportajen ekipa Rafa.tl