Polísia Buka Tuir Autór Ne’ebé Foti Osan Ofertóriu iha Igreja Becora

Komandante PNTL Munisípiu Díli, Superintendente Xefe Polísia Orlando Gomes. Imajen/Rafa.tl

DILI, RAFA.tl- Polísia Nasionál Timor-Leste (PNTL) Munisípiu Díli simu ona keixa husi parte Igreja Parókia Sagrado Coração de Jesus, Becora, hodi orienta ona membru Polísia ho ekipa sekreta sira  buka tuir autór sira foti osan ofertóriu Igreja nian ne’ebé tau iha Estátua Nossa Señora nia oin.

Komandante PNTL Munisípiu Díli, Superintendente Xefe Polísia Orlando Gomes, ba jornalista sira iha Sentru Treinamentu Akademia Futeból, Becora, Tersa (03/02/2026) hateten, Komandu PNTL Munisípiu Díli liuhosi Eskuadra Kristu-Rei, simu ona keixa husi Igreja Parókia Sagrado Coração de Jesus, Becora, ho nune’e, membru Polísia sira hamutuk ho ekipa sekreta hahú halo investigasaun hodi identifika autór sira ba aktu ne’e.

“Ita-nia polísia hosi eskuadra Kristu-Rei no mós ita-nia informasaun sekreta sira agora dadaun buka tuir hela  suspeitu ka autór sira ne’e tanba ita iha CCTV ne’ebé ha’u hanoin katak  buka hela para identifika no hetan karik, ita halo prosesu,” Superintendente Xefe Polísia Orlando Gomes hateten.

Iha fatin seluk Koordenadór Jerál Konsellu Parokiál Becora, Fernando Xavier hatete kazu ne’e akontese iha Sábadu-kalan, foin lalais ne’e, suspeitu na’in-tolu tama hodi foti kofre rua iha estátua Nossa Señora nia ain.

Nia haktuir iha Sesta-feira kalan to’o iha Sábadu-madrugada, iha ema deskoñesidu na’in-tolu ne’ebé tama iha Igreja laran liuhosi janela no konsege ida mak tama tiha mai iha igreja laran, na’in-rua hein iha li’ur, ikus mai sira foti konfre rua ne’ebé tau hela iha Estátua Nossa Señora nia ain.

“Sira hiit  sai tiha ba iha li’ur, sira selok sai tiha, sira foti hotu tiha osan iha laran depois soe hela kofre iha li’ur, maka Sábadu-dadeer,  ami atu mai misa foin ami hetan katak sira tama foti kofre soe hela iha li’ur, nune’e ami foti fila-fali kofre entaun iha Sábadu ami la konsege halo keixa ba Polísia depois to’o Segunda-dadeer mak ha’u rasik lori kazu ne’e ba aprezenta iha Polísia Eskuadra Kristu-Rei  halo ona prosesa atu bele buka tuir autór sira,” Fernando Xavier informa.

Fernando Xavier esplika iha janela ida mak kondisaun ladun metin, ema ne’ebé deskonfia tama katak ema ne’e hatene hela situasaun igreja nian, tanba janela ne’e aat iha semana hirak liubá seidauk hadi’a.

Hafoin akompaña video CCTV, komunidade sira ne’ebé hela besik iha resintu igreja nian haré video ne’ebé autór sira tama ne’e iha balun sira deskonfia koñese hela, maibe hein investigasaun husi Polísia.

Fernando Xavier husu ba sarani hotu ne’ebé hela besik iha Igreja Parókia do Sagrado Coração de Jesus, Becora, presiza tau matan, atu nune’e, ba oin labele tan akontese buat ne’ebe la espera.

Reportajen Ekipa Rafa.tl