Polísia Asegura Sidadaun Na’in-20 Durante Natal

Komandante PNTL Munisípiu Díli, Superintendente Xefe Polísia Orlando Gomes. Imajen/Rafa.tl

DILI, RAFA.tl– Polísia Nasionál Timor-Leste (PNTL) Munisípiu Díli, asegura sidadaun na’in-20 durante Natal tanba halo konflitu no perturba orden públika iha bairu no komunidade sira-nia let.

Komandante PNTL Munisípiu Díli, Superintendente Xefe Polísia Orlando Gomes hatete, durante selebrasaun misa Natal, Komandu Polísia Munisípiu Díli hamutuk ho ekipa konjunta Polísia Unidade ho FALINTIL-Forsa Defeza Timor-Leste (F-FDTL)  asegura  joven na’in-20 resin tanba  halo konflitu iha bairru laran no balun iha kondisaun lanu.

“Durante iha Natal, Polísia kaptura joven sira ne’ebé konsumu tua, no mós balun halo konflitu, ita halo prevensaun kaptura ema 20-resin hodi detein iha sela durante oras 12, depois halo identifikasaun, nune’e balun iha duni prova krime, Polísia rekomenda ba Ministériu Públiku  para kontinua prosesu investigasaun,” Superintendente Xefe Polísia Orlando Gomes informa ba jornalista sira iha Sentru Konvensaun Díli (CCD, sigla portugés), Segunda (29/12/2025).

Superintendente Xefe Polísia ne’e hatutan, kona-bá joven sira ne’ebé konsumu tua la tuir fatin no sira ne’ebé halo konflitu iha bairru ne’ebé identifika, hanesan Suku Madohi, Suku Vila-Verde iha área Tuana-Laran, hodi hamosu konflitu entre joven sira, ekipa operasaun konjuntu PNTL no F-FDTL halo kedas prevensaun no konsege kaptura hotu kedas suspeitu sira.

Durante selebrasaun Misa Natal  ne’e, PNTL koloka mós Polísia Unidade Tránzitu iha Igreja no Kapela sira iha Kapitál Díli hodi asegura movimentu transporte sira.

Iha períodu tempu natal, PNTL Munisípiu Díli rejista asidente fatál ida ne’ebé akontese iha área Hudi-Laran, soke malu entre motór ho karreta rezulta joven ida lakon vida.

PNTL mós kontinua halo investigasaun ba kazu joven ida ne’ebé oho aan liu husi konsumu ai-moruk potas.

Reportajen ekipa Rafa.tl