PNTL Simu Ona Despaixu Halo Re-teste Ba Kandidatu Kadete PNTL Hamutuk 12.996

Segundu Komandante Jerál PNTL, Komisária Assistente Polísia Natercia Eufasia Soares Martins.

Díli, 05 Agostu 2026 (RAFA) – Polísia Nasional Timor-Leste (PNTL) simu ona despaixu ofisiál husi Ministériu Interior atu hahú preparativu ba realizasaun re-teste ba kandidatu foun PNTL hamutuk na´in-12.996, ne’ebé antes ne’e tuir ona prosesu selesaun ba rekrutamentu.

Segundu Komandante Jerál PNTL, Komisária Assistente Polísia Natercia Eufasia Soares Martins, Kuarta-ne’e, informa katak atrazu ne’ebé akontese durante ne’e tanba seidauk iha despaixu ofisiál husi Ministériu Interiór atu forma komisaun responsavel ba prosesu re-teste.

“Problema ne’ebé akontese mak atrazu hodi hetan despaixu husi Ministériu Interiór. Depois despaixu ne’e mai, ami bele forma estrutura ka komisaun atu hala’o servisu. Despaixu ne’e tun ona iha semana kotuk, no ekipa komisaun mós forma ona. Agora daudaun sira iha hela dezenvolve etapa sira atu prepara prosesu re-teste,” Komisária Assistente Polísia Natercia Eufasia Soares Martins haktuir  ba jornalista sira iha Díli.

Nia esplika katak despaixu refere fó autorizasaun ba PNTL atu organiza no hala’o fila-fali prosesu avaliasaun ho transparénsia, imparsiálidade no profesionalizmu, tuir orientasaun Governu no lejislasaun ne’ebé vigora.

Informasaun husi PNTL katak  komisaun organizadora sei prepara etapa hotu-hotu ba re-teste, inklui verifikasaun dokumentu, ezame saúde, teste aptidaun fízika, teste eskrita no entrevista. Data ofisiál ba realizasaun re-teste sei anúnsia iha tempu badak liuhusi kanál ofisiál PNTL.

Komisária Assistente Polísia  ne’e mós husu ba kandidatu sira hotu atu prepara aan ho di’ak no akompaña deit informasaun ofisiál husi PNTL.

Komisaun organizadora ba re-teste ne’e kompostu husi reprezentante PNTL, Komisaun Funsaun Públika, Parseiru Austrália Federal Polísia (AFP)–Timor-Leste Police Development Program (AFP–TLDP) no Polísia Gurda Nasionál Republikana (GNR) Portugal, ne’ebé sei servisu hamutuk hodi asegura prosesu selesaun kandidatu foun lao ho transparénsia, kredibilidade no tuir prinsipiu meritokrasia.

Liu husi re-teste ida-ne’e sei garante prosesu rekrutamentu ne’ebé justo, kredível no meritu-bazeadu, hodi produz rekursu umanu polisiál ne’ebé iha kapasidade atu fó servisu di’ak ba povu ho integridade no profisionalizmu.

Jornalista: João Carlos