PNTL Sei Intensifika Patrullamentu iha Díli Laran

Komandante PNTL Munisípiu Díli, Komisáriu Asistente Polísia Orlando Gomes.

Díli, 5 Outubru 2026  (RAFA) -Polísia Nasionál Timor-Leste (PNTL) Munisípiu Díli, sei intensifika operasaun ka patrullamentu ba fatin sira ne’ebé risku konflitu no asidente tráfiku iha Díli laran.

Komandante PNTL Munisípiu Díli, Komisáriu Asistente  Polísia Orlando Gomes, afirma operasaun ne’e nu’udar ezersisiu PNTL Díli nian atu prevene konflitu no asidente  tráfiku sira ne’ebé akontese beibaik iha bairru sira, inklui iha Estrada protokolu sira.

Iha enkontru mensal ho komandante Polísia Eskuadra Kristu Rei, Vera Kruz, Dom Aleixo, Metinaro no Polísia Tránzitu, Segunda-ne’e,  Komisáriu Asistente  Polísia Orlando Gomes, oreinta ona  kamandante polísia eskaudra sira atu intensifika patrulamentu no vijilánsia, inklui kontrolu ba atividade ilegál sira ne’ebé akontese iha kapitál Díli, liuliu iha tempu kalan.

“Iha tempu kalan, ita nafatin monitoriza no tau orden ne’ebé di’ak iha ita nia sosiedade Díli, atu buat hotu bele lao tuir orden,” Orlando Gomes hateten ba jornalista sira.

Nia  fó mós orientasaun ba Polísia Tránzitu Díli atu aumenta kontrolu ba karreta no motór sira ne’ebé estasiona arbiru iha Estrada públika no iha bairru-bairru sira, liuliu iha tempu kalan tanba prejudika movimentu emerjénsia.

Antes ne’e, Diretór Polísia Tránzitu Seguransa Rodoviária Nasionál, Superintendente Xefe Polísia João da Costa, fó sai dadus kona-bá asidente tráfiku ne’ebé akontese iha fulan-Janeiru to’o fulan-Agostu tinan 2026, hamutuk 1.282.

Husi total asidente hirak-ne’e, ema na’in-84 lakon vida. Enkuantu, sira seluk sofre kanek ho nivel diferente.

Jornalista: João Carlos/Juvinal Cabral dos Santos