PNTL Sei Halo Apreensaun no Aplika Koima Ba Karreta Ne’ebé Okupa Estrada Públiku

Karreta privadu sira kontinua okupa estrada públiku ne'ebé bele afeta ba movimentu iha estrada laran.

Díli, 01  Outubru 2026 (RAFA)– Komandante Polísia Nasionál Timor-Leste (PNTL) Munisípiu Díli, Komisáriu Asistente Polísia Orlando Gomes, alerta sei halo apreensaun ba karreta sira ne´ebé para la tuir regra  no okupa estrada públiku.

Komisáriu Asistente Polísia Orlando Gomes, afirma katak sidadaun sira ne´ebé sosa  karreta tenke iha parajen privadu, nune’e labele okupa estrada públiku hodi impede atendimentu situasaun urjenti sira tanba ne´e bele afeita bá servisu emerjensia sira.

“Ita nia kapitál Díli ita halo ona operasaun ba bairu sira katak sidadaun sira sosa karreta, tenke iha parajen atu labele okupa iha Estrada tanba estrada atu fasilita movimentu transporte sira, inklu movimentu emerjensia,” Komisáriu Asistente Polísia Orlando Gomes hateten ba jornalista sira  iha Díli, Kinta-ne’e.

Komisáriu Asistente Polísia ne’e esplika, iha kapital Díli estrada tama bairu sira reablita ona, maibé rezidente barak kontinua okupa Estrada sira-bee hodi estasiona sira-nia karreta.

“Husi Komandu Munisípiu Díli hakarak apela bá motorista sira hotu ne’ebé mak uza transporte katak atu bele buka fatin parajen atu nune’e para no labele para karreta iha estrada ninin,” Komisáriu Asistente Polísia Orlando Gomes hateten.

Komandu Polísia Munisípiu Díli sei koordena hamutuk ho Sekretáriu Estadu Asuntu Toponimia Organizasaun Urbanas  (SEATOU)  hodi halo kontrola ba karreta sira ne’ebé mak para iha estrada no sei aplika koima tuir lei ne´ebé vigóra.

Jornalista: Juvinal Cabral/João Carlos