PNTL Rejistu Ona Kazu Indonéziu Na’in-tolu ho Jet Privadu Cesna C700 iha Ministériu Públiku

Indonéziu na'in-tolu ne'ebé jet privadu ho tipu Cesna C700 mai atu tula sai la konsege, maibé sai fai ho Aero Dili. Imajen/Espesiál

Díli, 06 Jullu 2026 (RAFA.TL)-Porta-vós Komandu Jerál Polísia Nasionál Timor-Leste (PNTL), Superintendente Xefe João Belo dos Reis, Segunda (6/07/2026), informa PNTL rejistu ona kazu kontroversiál kona-bá sidadaun Indonézia na’in-tolu ne’ebé envolve tentativa atu sai husi teritoriu Timor-Leste ho Jet Privadu Cesna C700 ba iha Ministériu Públiku.

“Investigasaun Kriminal halo intevensaun ba pontu ida de’it kona-bá dokumentu ne’ebé mak maluk sira akompaña kompañia JeTrans mensiona ona ita nia nai balun  nia naran iha ne’eba, relasaun ba ne’e kalan ne’e kedas ami halo intervensaun depois ami komunika kedas aviaun nain jerente Operasional dadeer ne’e kedas sira mai. Kompletu liután ida ne’ebé jerente operasional nain-rua mai tan, iha Sesta kotuk (03/07/2026) fó ona sira nia deklarsaun ho voluntariamente  husi sira nia rain mai ita nia rai hodi fó klarifikasaun ba karta ne’ebé mak sira halo,” Porta-vós PNTL, Superintendente Xefe João Belo dos Reis informa   ba jornalista sira ihaKuartel  Jerál PNTL.

Porta-vós PNTL hatutan empreza JeTrans  mós halo ona karta klarifikasaun depois mós husu ona deskulpa ba fallansu ne’ebé sira halo, kazu ne’e rasik DSIK Rejista ona iha IMS ho numeru 0233/26/PNSIK.

Superintendente Xefe ne´e mós esplika kona-bá s Indoneziu na’in-tolu ne’e, parte DSIK halo kontaktu kedas ba Embaixada Indonézia iha Timor-Leste, hodi hatudu profile  sidadaun na’in-tolu ne’e ho sira-nia funsaun lolos iha Indonézia hanesan Emprezariu kona-ba atividade Otel no Batu Bara nian.

Parte DSIK halo intervensaun ba situasaun aviaun Jet privadu  ne’e kona-ba karta ne´ebé haruka mai Timor-Leste, ne´ebé Polísia seidauk bele atu fó sai kona-ba konteudu karta ne’e  tanba nia prosesu investigasaun sei la’o hela.

Kazu ne’e hahú bainhira aviaun jet privadu tipu Cessna Citation 700 Longitude, ne’ebé mai husi Jakarta, tun iha Aeroportu Internasionál Prezidente Nicolau Lobato.

Dokumentu pedidu autorizasaun ba voo refere dehan katak pasajeiru sira sei halo enkontru ho Prezidenti Repúblika. Maibé, depois autoridade sira halo verifikasaun, Prezidenti Repúblika, José Ramos-Horta hatete katak  nia la konvida no la hatene sidadaun sira ne’e, no afirma katak ema balun uza nia naran ilegalmente atu hetan autorizasaun ba voo refere.

Maski sidadaun Indonézia na’in-tolu refere iha investigasaun nian  laran, maibé ikus mai konsege sai husi Timor-Leste ho  voo komersiál Aero Dili. Entretantu,  aviaun jet privadu ne’e kontinua hela iha aeroportu atu fasilita prosesu investigasaun.

PNTL konfirma katak kazu ne’e rejistu ona ofisialmente iha Ministériu Públiku, ne’ebé sei lidera investigasaun atu determina se iha violasaun lei kriminal, falsifikasaun dokumentu, ka utilizasaun naran autoridade Estadu ho forma ilegal.

Jornalista: João Carlos/Editór: Vito Salvadór