PNTL-KRAM Halo Sosializasaun Kona-bá Paz no Prevensaun Konflitu iha Eskola sira

PNTL ho KRAM halo sosializasaun kona-bá edukasaun paz no prevensaun konflitu ba estudante sira iha Eskola Ensinu Sekundáriu Jerál Públiku FINANTIL, Díli, Segunda 8 Juñu 2026.

Díli, 08 Juñu 2026 (RAFA.TL)- Polísia Nasionál Timor-Leste (PNTL) hamutuk ho Komisaun Reguladora Arte-Marsiál (KRAM), Segunda (8/6/2026), halo sosializasaun kona-bá edukasaun paz no prevensaun konflitu ba estudante sira iha Eskola Ensinu Sekundáriu Jerál Públiku Fitun Nabilan Lorosa’e (FINANTIL).

Segundu Komandante PNTL Munisípiu Díli, Superintendente Polísia, Luis da Silva, hatete atividade ne’e parte husi programa sosializasaun psikososiál ba estudante sira atu evita violénsia no halo mudansa ba karater estudante sira nian iha komunidade hodi kontribu ba estabilidade iha eskola no sosiedade nia let.

“Prosesu sensibilizasaun ami deside hamutuk ho KRAM no Ministériu Edukasaun eskolla eskola  hamutuk 11 ne’ebé mak iha segunda trimestral ne’e. Ami halo sensibilizasaun kona-bá kodigu estrada, lei krime nian atu garante paz no estabilidade,” Superintendente Polísia Luis da Silva hateten.

PNTL no KRAM ho Ministériu Edukasaun identifika eskola hirak ne’e tanba haré ba pasadu eskola sira ne’e iha risku sempre halo problema iha liur no lori fali ba iha organizasaun, depois estudante sira mós utiliza motorizada sira la uza kapasete no uza kanu resin.

Iha fatin hanesan, Adjuntu Diretór Ensinu Sekundáriu Públiku FINANTIL, Sabino Ernesto hatete, atividade ne’e importante tanba bele halo sosializaun edukasaun sivika ba estudante sira kona-bá oinsá bele iha koñesimentu ba regulamentu sira, hodi prevene konflitu iha eskola no sosiedade.

“Espera katak liu husi atividade ida ne’e bele muda ami nia estudante sira ninia hahalok sira n’ebé durante ne’e sempre envolve iha komete krime sira hanesan baku malu no utiliza motór la kumpre kodégu Estrada,” nia tenik.

Nia rekoiñese iha estudante balun lori problema husi li’ur mai iha korridór eskola nian, maibé agora menus ona no bainhira identifika estudante sira hanesan ne´e sempre koopera ho autoridade seguransa no entrega ba parte PNTL hodi prosesa tuir lei.

Atividade Sosializasaun ne´ebé PNTL no KRAM hamutuk ho Ministériu Edukasaun halo ne´e, kobre eskola sira hanesan, FINANTIL, Eskola 10 de Dezembru, 04 de Setembru, Novel da Paz no seluk tan.

Jornalista: João Carlos/Editór: Vito Salvadór