PNTL Kaptura Xinés Na’in-29 Deskonfia Loke Jogu Online no Scam Call Centre iha Manleuana

Polísia halo idenitifkasaun ba sidadaun estranjeiru ho nasionalidade Xina ne'ebé deskonfia envolve jogu ilísitu online scamming iha uma ida iha Manleuana, Díli, Kuarta 08 Jullu 2026.

Díli, 08 Jullu 2026 (RAFA.TL)- Polísia Nasionál Timor-Leste (PNTL), liu husi Servisu Diresaun Servisu Investigasaun Kriminál (DSIK) no Servisu Migrasaun, Kuarta-ne´e, halo buska no apreensaun ba uma ida iha área Manleuana, Díli, hodi  kaptura no detein  sidadaun  estranjeiru ho nasionalidade Xina na’in-29 ne’ebé deskonfia loke jogu online no scam call centre,

Operasaun ba  fatin ne’ebé deskonfia halo atividade ilísitu  ne’e lidera direita husi  Diretór Nasionál  DSIK Superentendente Xefi Polísia João Belo dos Reis, hamutuk ho ekipa konjunta husi parte servisu Migsraun hodi halo revista ba edifísiu no rekolla evidénsia balun hanesan Laptop, Telemovel, osan no ekipamentu internet ne’ebé uza ba halo instalasaun no mós dokumentu relevante sira hanesan pasaporte.

Iha opersaun ne’e, autoridade sira mós halo identifikasaun ba  sidadaun Xinés hamutuk na’in-29 kompostu husi feto na’in-tolu no mane na’in-26 ne’ebé deskonfia envolve iha rede jogu online no scam call centre.

Hafoin halo identifikasaun iha uma ne’ebé deskonfia sai sentru ba  atividade jogu online no scam call centre  ne´e, autoridade seguransa mós kontinua kedas halo verifikasaun ba dokumentu migrasaun atu hatene sira nia estatutu legál iha Timor-Leste hodi buka tuir sira nia atividade ba rede kriminál ne’e autor sira envolve ba.

Duarte Felicidade, nu’udar uma-nain informa sidadaun sira ne’e aluga nia uma desde fulan-Maiu tinan ne’e, maibé lahate suspeitu sira loke atividade jogu ilísitu.

“Atividade ne’e ha’u lahatene ida, tanba uma ne’e mamuk hela, Xina ida mai buka uma atu aluga fó folin mós di’ak ho valor  $4,500.00 kada fulan, entaun ami simu. Sira ne’e mai hatete katak ema sira ne´e mai servisu projetu Sentru Konvensaun Internasionál  iha antigun Portu Díli. Maibé, Polísia ohin mai bolu fali ha’u iha uma mak ha’u hakfodak sira  tanba durante ne’e ha’u laiha koñeismentu ba informasaun sira atividade ilísitu sira-ne´e,” Duarte Felicidade  informa ba jornalista sira.

Hafoin halo identifikasaun no verifikasaun ba faktu sira, DSIK no Servisu Migrasaun transporta kedas sidadaun sira ne´e ba iha Komandu Jerál PNTL hodi kontinua halo investigasaun no detensaun ba sira durante oras 72 molok aprejenta ba Ministeriu Públiku.

Jornalista : João Carlos/Editór: Vito Salvadór