PNTL Kaptura Membru Polísia Sientífika Investigasaun Kriminál

PNTL halo kapturasaun ba membru PCIC, Kuarta 29 Jullu 2026.

Díli, 29 Jullu 2026 (RAFA.TL) – Polísia Nasionál Timor-Leste (PNTL) Munisípiu Díli, Kuarta-ne’e, hale’u tuku 10:00 dadeer Otl,   ezekuta mandadu detensaun husi Tribunál  hodi  kaptura membru ida husi Polísia Sientífika Investigasaun Kriminál (PCIC).

Informasaun ne’ebé espalla iha prosesu kapturasaun  ne’ebé hala’o iha edifísiu  PCIC  ne’e, deskonfia   iha relasaun ho aktu membru PCIC refere ne’ebé halo intervensaun ka interrupsaun ba  operasaun ekipa konjunta PNTL ho Servisu Migrasaun nian bainhira identifika no dezmantela rede scam call centre iha  área Kampu Baru, Comoro, Díli, Segunda-kalan liubá.

Hafoin  ezekuta mandadu kapturasaun no detensaun ne’e, PNTL lori membru PCIC ne’e ba detein iha sela Komandu PNTL hodi kumpri oras 72 molok aprejenta ba  Tribunál.

Iha Tersa-horiseik, portavóz Komandu Jerál PNTL, Superitendente Xefe João Belo dos Reis, konsidera dezentenmentu entre ekipa Polísia Diresasaun Servisu Investigasaun Kriminál (DSIK) ho membru PCIC iha atusaun ba kazu scaming call centre iha Kampu Baru, Comoro, la prejudika kontinuidade servisu operasaun ne’ebé autoridade sira hala’o.

“Normal kuandu Estadu tau instituisaun rua ne’ebe halo servisu hanesan, ne’e ha’u hanoin lapresiza tau instituisaun rua servisu ne’ebé hanesan tanba bele prejudika ba ita nia operasaun  ne’ebé maka ita hala’o, mais ita tenta minimiza konflitu sira ho maneira  persoasivu,” Superitendente Xefe  Polísia João Belo dos Reis  informa ba jornalista sira.

Nia klarifika katak prosesu koordenasaun entre PNTL no PCIC nafatin sai prioridade atu asegura efisiénsia no profisionalizmu iha implementasaun lei.

Iha operasaun ba buska no apreensaun rede scam call centre iha Kampu Baru, Comoro, Segunda-kalan, mosu dezentendimentu entre membru DSIK ho membru PCIC ne’ebé ikus mai video dezentendimentu nian sai viral iha mídia sosiál Facebook.

Fó hanoin hikas katak instrumentu legál ne’ebé regula órgaun polísia kriminál sira iha Timor-Leste – Lei kona-bá Organizasaun Investigasaun Kriminál (LOIC), 9/2022 – estabelese ho klaru distinsaun iha kompeténsia sira entre Polísia Nasionál Timor-Leste (PNTL) no Polísia Sientífika  Investigasaun Kriminál (PCIC), rua ne’e hotu klasifika hanesan “órgaun polísia kriminál kompeténsia jenérika nian”.

Instrumentu ne’e define katak PNTL, ho delegasaun autoridade judisiária, responsavel ba investigasaun krime sira ne’ebé nia kompeténsia la rezerva eskluzivamente ba PCIC ka órgaun espesializadu sira seluk.

Lei fó kompeténsia eskluzivu ba PCIC atu investiga konjuntu krime sira ne’ebé luan no exaustivu, inklui krime sira hasoru vida, tráfiku umanu, krime seksuál sira, krime sira hasoru seguransa estadu nian, fraude informátika agravadu, no brankeamentu kapitál, entre sira seluk.

Iha artigu ida-ne’e nia laran maka krime sira relasiona ho rede sira scam call centre monu, liuliu liuhosi fraude informátiku agravadu, ne’ebé esplika PCIC nia intervensaun iha operasaun sira ho natureza ida-ne’e.

Artigu 7 hosi dekretu ne’e estipula katak órgaun sira polísia kriminál nian ho kompeténsia jerál – hanesan PNTL (Polísia Nasionál Timor-Leste nian) – tenke hadook-an hosi hahú ka kontinua investigasaun sira ba krime sira ne’ebé hetan daudaun investigasaun hosi órgaun espesializadu ida, hanesan PCIC (Polísia Investigasaun Kriminál).

Regra ida-ne’e hakarak evita sobrepozisaun operasionál sira, hanesan ida ne’ebé karik sai hanesan orijen ba dezentendimentu entre elementu sira hosi Diresaun Servisu Investigasaun Kriminal (DSIK) hosi PNTL ho PCIC.

Dekretu ne’e rasik prevee, iha n.º 4 hosi Artigu 7º, mekanizmu atu rezolve konflitu jurisdisaun sira-ne’e: iha situasaun ne’ebé órgaun polísia kriminál rua ka liu reklama kompeténsia ba kazu ne’ebé hanesan, autoridade judisiária kompetente deside, tuir lei prosesu penál nian.

Polísia Sientífika no Investigasaun Kriminál nia Lei Orgánika rasik (Dekretu-Lei Nú. 15/2014, loron 14 fulan Maiu, ne’ebé hetan alterasaun hosi Dekretu-Lei Nú.

Órgaun polísia kriminál sira seluk tenke relata kedas ba PCIC faktu ruma ne’ebé sira hatene relasiona ho preparasaun no ezekusaun ba tipu krime ida-ne’e no, to’o nia intervensaun, hala’o medida prekausaun hotu-hotu ne’ebé nesesáriu no urjente atu asegura evidénsia.

Jornalista: João Carlos