PNTL Halo Buska no Apreensaun Ba Rede Scam Call Centre iha Santa Kruz, Bebonuk ho Vila-Verde

Prova sira ne'ebé ekipa konjunta halo apprensaun iha buska ba atividade ilísitu scam call centre, Tersa-kalan, 11 Agostu 2026.

Díli, 12 Agostu 2026  (RAFA)- Polísia Nasionál Timor-Leste (PNTL) liuhosi Diresaun Servisu Investigasaun Kriminál (DSIK) hamutuk ho Diresaun Servisu Informasaun Polísia (DSIP), Tersa-kalan, halo operasaun buska no apreensaun ba rede atividade ilísitu scam call centre iha área Santa Kruz, Bebonuk ho Vila-Verde, Díli.

Iha operasaun ne’e, PNTL ho nia ekipa  halo detensaun  ba sidadaun estranjeiru na’in-13 ne’ebé envolve iha atividade scam call centre iha rezidénsia tolu iha área sira refere.

Observasaun RAFA iha terenu hatudu katak ekipa konjunta tama ba rezidénsia ida iha Suku Santa Kruz, hale’u tuku 23:00 Otl, hodi dezmantela atividade ne’ebé iha indisiu ho atividade scam call centre no detein sidadaun estranjeiru ho nasionalidade Xina  na’in-rua, maibé  sira rasik la kaer sira-nia pasaporte.

Evidénsia ne’ebé autoridade seguransa preende mak laptop 16, komputador ida, telefone 11, pasaporte ida, aparellu STARLINK ida, osan besik US$3,000 resin no karreta ida.

Tuir informasaun husi uma-na’in ne’ebé lakohi publika nia identidade, hateten sidadaun Xinés sira asina kontratu atu arrenda uma durante fulan-ualu ho folin US$2,200.00 ba kada fulan no Sira selu ona fulan-rua ho montante US$4,400.00..

Ekipa kontinua kontinua halo operasaun ba rezidénsia ida iha Bebonuk hodi identifika no  detein tan sidadaun estranjeiru  ho nasionalidade Xina na’in-rua  no Indonézia na’in-ida. Tuir informasaun, sira servisu hamutuk no fahe hela fatin.

Polísia tama ba rezidénsia uma andár tolu ho kuartu hamutuk 10 ne’ebé sidadaun estranjeiru hela. Iha laran ekipa hetan aparellu STARLINK-ida, komputador-ida, laptop-ida, telefone seidauk sura, meza 10-resin, kulisaun 10-resin, no fiu instalasaun barak.

Polísia mós hetan kartu ki’ik hakerek “Scratch Area” ho  ekipamentu eletroniku ho kuantidade barak ne’ebé rai iha kaixa-rua, ne’ebé deskonfia uza ba atividade Scam Call Centre.

Bainhira PNTL atu halo buska no aprensaun sidadaun Xineza na’in-rua la koopera no ko’alia ho lian maka’ás hasoru autoridade seguransa uza lian Xina.

Maske nune’e polísia kontinua konsola hodi koopera hafoin polísia hala’o nia servisu, pasa revista sidadaun na’in-tolu kompleta ho pasaporte, no tama sai kuartu sira iha rezidensia laran.

Iha Bebonuk ne’e, sidadaun estranjeiru sira estabelese  kontratu ho uma na’in iha hahú iha loron 10 fulan-Agostu ne’e ho durasaun tempu fulan-ulau  ho kustu arrendamentu  US$2,500.00 kada fulan no selu uluk ona fulan-tolu ho montante US$7,500.00.

Iha fali Kuarta-dader, hale’u tuku 05:00 Otl, PNTL  kontinua operasaun ba rezidensia ida iha Villa-Verde no detein  sidadaun Xina na’in-hitu  (7)  no Vanuatu na’in-ida hamutuk na’in-ualu.

Autoridade polísia  komprova sidadaun estranjeiru na’in-hitu nia vistu mate, no na’in-ida mak nia vistu moris.

Husi pasaporte ne’e hatudu katak sidadaun sira ne’e maioria mai husi Kambodia. Ekipa konjunta  identifika sidadaun estranjeiru sira instala aparelu STARLINK hamutuk rua, meza ne’ebé utiliza ba atividade scam call centre  hamutuk haat.

Parte Polísia halo mós apreensaun ba prova seluk mak telefone seidauk sura, laptop rua, no sasán sira seluk ne’ebé utiliza ba atividade ilísitu ne’e.

Hafoin hala’o buska no apreensaun iha fatin sira ne’e, ekipa konjunta lori kedas sidadaun estranjeiru no evidénsia sira hotu ba iha edifísiu Diresaun Servisu Investigasaun Kriminál, Kuartel Jerál PNTL hodi kontinua prosesu identifikasaun no detensaun.

Jornalista: Juvinal Cabral dos Santos