PNTL Hahú Halo Identifikasaun Ba Moeda Sentavu Falsu no Buka Tuir Autór Sira

Osan Moeda Sentavu orijinál ho Falsu. Imajen/Rafa.tl

DILI, RAFA.tl- Polísia Nasionál Timor-Leste (PNTL) hahú halo identifikasaun ba kazu moeda sentavu falsu ne’ebé espalla iha teritóriu nasionál no buka tuir autór sira.

Notísia Relevante: BCTL Identifika Moeda Falsu Sentavu 200

Porta-voz interinu Komandu Jerál PNTL, Superintendente Asistente Polísia Mouzinho Tavares Correia hatete, PNTL kontinua halo prosesu investigasaun ba moeda falsu sentavu 200 ne’ebé sirkula ona iha teritóriu Timor-Leste.

Nia hatutan, autoridade seguransa ho Banku Sentrál Timor-Leste (BCTL, sigla portugés) fó sai ona ba públiku atu hotu-hotu koopera no kolabora hodi identifika moeda falsu sentavu 200 iha atividade tranzaksaun merkadoria sira atu moeda falsu ne’e labele kontinua sirkula.

“Métodu ezame ne’e mais tékniku, mais ha’u hakarak hatete ita halo profile  ba osan falsu no orijinál, entaun iha ne’ebá barumeter lubuk ida mak ita atu uza hodi identifika katak ida-ne’e osan falsu ka orijinál, maibé iha elementus balun ne’ebé iha ita bele haré ho matan rasik liu-liu ba asentu sira ne’e, superfísie  sira ne’e mós la hanesan entre moeda falsu no orijinál,” Superintendente Asistente Polísia Mouzinho Tavares Correia ba jornalista sira iha Ministériu Interiór, Díli,  Kinta (05/03/2026).

Porta-voz ne’e hatutan, PNTL sei identifika tuir produsaun osan moeda ne’e, tanba ne’e sei lori tempu hodi identifika suspeitu sira. Prosesu investigasaun sei la’o hela, seidauk dehan produsaun osan ne’e iha rai laran ka rai li’ur, mais klaru katak ida ne’e la’ós ema bai-bain mak halo ne’ebé mai ho rekursu sufisiente ka natón.

Nia argumenta, prosesu investigasaun ne’e iha faze lubuk ida, PNTL hein  delegasaun husi  Ministériu Públiku bainhira iha ona despaixu kontinua arrola    faktu sira ka evidénsia sira ne’e hafoin bele  submete fila-fali  ba iha Ministériu Públiku .

“Ministériu Públiku mak na’in ba prosesu hotu-hotu depende ba ninia desizaun atu delega fila-fali mai PNTL ka ba órgaun polísia Kriminál  sira seluk atu halo investigasaun,” nia tenik.

Superintendente Asistente Polísia ne’e subliña, relasiona ho sirkulasaun no seidauk hatene autór sira ne’ebé envolve ba produsaun moeda falsu  sira ne’e, tanba ne’e públiku hotu atu kolabora hodi kontaktu ba autoridade sira bainhira hetan ka simu moeda falsu sira ne’e.

Reportajen ekipa Rafa.tl