PNTL Garante Seguransa Másimu Durante Vizita Urna Preladus sira To’o Sermónia Funebre iha Igreja Katedral Díli

PNTL garante seguransa másimu durante vizita Urna Preladus sira To’o Sermónia Funebre iha Igreja Katedral Díli.

Díli, 31 Agostu 2026 (RAFA)- Komandante Polísia Nasionál Timor-Leste (PNTL) Munisípiu Díli, hamutuk ho Unidade Espesiál Polísia (UEP) no Unidade Polísia Marítima (UPM)  garante  fo seguransa másimu ho membru efetivu rihun-ida  hodi halo operasaun seguransa nasionál durante vizita restus mortais preladus na´in-haat to’o serimónia funebre iha Ijreja Parokia Katedral Imaculada de Conceção, Vila-Verde, Díli.

“Bazeia bá planu operasaun Nasionál ne’ebé mak atribui mai ha’u hanesan komandante operasaun seguransa taktikal nian  iha terenu. Ohin, ami realiza parada konjuntu entre Komandu Munisípiu Díli, UEP ho apoiu husi Komandu jerál nian atu bele hahú ona serimónia orsida kalan to’o iha aban ita sei simu  ita nia restus mortais ne’ebé mak mai,” hatete Komandante PNTL Munisípiu Díli, Komisáriu Asistente Polísia Orlando Gomes informa jornalista sira, Segunda-ne’e.

Komisariu Asistente ne´e informa mós katak, ohin orienta bá iha planu operasaun taktikal ninia bá membru sira tomak, ba komandante taktikal sira iha terenu atu nune’e sira kumpri no responsabilidade bá orden ne’ebé mak iha planu seguransa atu nune’e asegura vizita restus mortais mai iha Díli to’o iha serimónia funebre ninian.

Iha planu operasaun nasionál ida-idak ho ninia tarefa hahú kedas husi Aeroportu Internasionál Prezidente Nicolau Lobato Comoro, Tasi-Tolu no mós bá fatin sira ne’ebé mak Igreja termina ona. Tamba ne´e durante vizita preladus sira nian estrada públiku no movimentu transporte sira sei taka provizoriu iha oras balu no hafoin ida-ne´e bele loke no lao normal fila fali.

“Komandu Jerál PNTL sei  hatun efetivu PNTL hamutuk na’in-1000 hodi halo seguransa,” tenik nia.

Iha fatin seluk, Ministru Interiór Francisco da Costa Guterres hateten, sarani no komunidade sira tenke tau fiar ba forsa no polísia hodi halo seguransa ba iha restus mortais sira la’o di’ak.

“Ita tenke asegura para serimónia ne’e la’o ho di’ak, para honra duni bá Amu Bispo na’in-haat ne’e, tanba sira mós fó sira nia an bá hodi serbí ita nia rai”, hatete Ministru Interiór Francisco da Costa Guterres bá jornalista sira hafoin hala’o observasun iha fatin serimónia Tasi-Tolu.

Governante ne´e haktuir, Timor-Leste nia ukun an ne’e líder Igreja sira-ne’e hanesan Dom Martinho, Dom Alberto Ricardo sira envolve makaas iha rezisténsia laran. Tanba ne’e husu hotu-hotu katak simu restus mortais ne’e hotu-hotu nian, nune’e tau hamutuk neon ho laran hodi presta omenajen ba sira na’in-haat hodi tau matan nafatin ba nasaun ida-ne’e.

Joranlista: Juvinal Cabral dos Santos