PNTL Fó Formasaun Téknika no Fíziku Ba Investigadór CAC

Investigadór sira husi CAC tuir formasaun téknika no fiziku iha iha Sentru Formasaun PNTL, Segunda 21 Setembru 2026

Díli, 21 Setembru 2026 (RAFA) Díli–  Pesoál investigadór husi Komisaun Anti-Korupsaun (CAC) na’in-23 tuir formasaun kona-bá téknika no fiziku husi Polísia Nasional de Timor-Leste (PNTL).

Ho formasaun refere, Segunda-ne’e, Komandante Jerál PNTL Komisáriu Assistente Polísia Afonso dos Santos, asina akordu kooperasaun ho Komisáriu Komisaun Anti Korrupsaun, Rui Pereira dos Santos iha Sentru Formasaun Polísia, Díli.

Formasaun ne’e   fasilita husi Polísia Nasionál Timor-Leste hala’o durante semana ida iha  sentru Formasaun Polísia, ne’ebé formanadu sira sei aprende  kona-bá abilidade tékniku no fízika 80%  no  matéria   kona-bá investigasaun 20%.

Komisáriu Komisaun Anti Korrupsaun, Rui Pereira dos Santos, liu-husi  nia diskursu hatete, CAC hanesan instituisaun ne’ebé hala’o servisu investigasaun, maibé nia natureza diferente ho PNTL tanba CAC foka liubá área espesífika, liu-liu kombate korrupsaun.

“Ita presiza formasaun, kauze polísia nian, pelumenus sira iha matenek uitoan  kona-bá oinsá atu kaer ema, no maneira oinsá atu kaer suspeitu  sira ne’ebé ita kaer ne’e,” Komisáriu Rui Pereira dos Santos hateten.

Nia espera liu-husi formasaun ida-ne’e, investigadór CAC sira sei hetan oportunidade atu hasa’e tan sira-nia kapasidade no koñesimentu tékniku, hodi bele hala’o servisu investigasaun ho profisionalizmu ho  bázika husi Polísial.

Iha fatin hanesan reprezentante Komanndu Jerál Polísia Nasionál Timor-Leste (PNTL), Superintendente Xefe Armando Monteiro hatete,  durasaun formasaun ne’e durante semana ida nia laran, formandu sira sei  aprende kona-bá tékniku no tatika polísia ninian.

“Ita nia formasaun  sira sei fahe 20%  iha teuria no 80% sei halai liu bá prátika nian, tanba ne’e tempu limitadu, maibé sira ohin hato’o sira nia komprosiu katak durante semana ida nia laran  sira esforsu aan, hodi partisipa masímu,” Superintendente Xefe Armando Monteiro hateten.

Formandu sira sei treinu kona-bá oinsá atu   kontrola no lori ema, tanba  kna’ar ne’ebé  CAC halo ne’e úniku, no  espesifiku ho kazu korrupsaun ne’ebé liga ho krime grave. Tanba ne’e presiza iha abilidade no kapasidade oinsá atu kontrola aan no atu defeza bainhira hasoru agresaun ruma iha terenu

Nia informa, Polísia Nasionál Timor-Leste apoia  Komisaun Anti Korrupsaun bá iha investigasaun ne’e dezde tinan 2013, liu-liu  kona-bá operasaun.

Jornalista: Marcelino Tomae