PNTL Detein Xinés Na’in-Neen iha Otél Diamod Villa Laiha Passaporte

PNTL detein Xinés na'in-neen iha Otél Diamond Villa iha Av. Praia dos Coqueiros, Díli deskonfia envolve atividade ilísitu scam call centre, Kinta-kalan 03 Setembru 2026.

Díli, 03 Setembru 2026 (RAFA)- Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) hamutuk ho Diresaun Informasaun Polísia (DSIP), Kinta-kalan,  hale’u tuku 19:30 Otl, halo averiguasaun ba Otél  Diamond Villa iha  Avenida Praia dos Coqueiros no detein sidadaun Xina na´in-neen ne’ebé passaporte laiha liman.

Iha apreensaun no detensaun ne´e, parte autoridade konjunta rekolla mós evidensia hanesan komputadór hitu, laptop besik-10, telefone-10 resin, router-tolu no Starlink-tolu, inklui kartaun sim husi  operadór telekomunikasaun telemor ho kuantidade barak (kuaze atus-ida-resin).

Ho prova sira ne’e, deskonfia suspeitu sira ne’e envolve pratika atividade ilísitu scam call centre.

Observasun RAFA iha terenu haré katak autoridade seguransa husi DSIK no DSIP tama Otél Diamond Villa iha Avenida Praia dos Coqueiros hodi halo buska, apreensaun no detein sidadaun Xina na’in-neen, maibé sira hotu laiha pasaporte iha liman.

Autoridade seguransa to’o iha fatin sidadaun Xina na’in-ida tenta kesi simkard telemor tau plastiku kuaze 100 resin ne’e hodi soe sai husi moru, maibé la konsege no polísia foti hanesan evidensia ne’ebé deskonfia suspeitu utiliza bá atividade ilísitu scam call centre.

Tuir informasaun katak Xinés sira ne’e balun hela iha Otél Diamond Villa to’o tinan ida, no balun hela to’o fulan-ualu. Kada fulan sidadaun estranjeiru sira arenda kada uma ida iha laran kuartu rua ne’e ho kustu 1,000.00 USD.

Kalan ne’e  kedas Autpridade Seguransa sira  trnasporta Xinés na’in neen ne’e hamutuk ho evidénsia sira ba iha edifisiu DSIK iha Kuartel  Jerál PNTL hodi submete ba prosesu identifikasaun, investigasaun no detensaun.

Jornalista: Juvinal Cabral dos Santos/ Fidelino de Araújo