PNTL Detein Xinés Na’in-Lima Ne’ebé Navega Ró Laiha Dokumentu

PNTL detein Xinés na'in-lima ne'ebé navega Ró laiha dokumentu, Segunda-kalan 7 Setembru 2026.

Díli, 08 Setembru 2026 (RAFA)- Polísia Nasionál Timor-Leste (PNTL) liuhosi Unidade Polísia Marítima (UPM) detein sidadaun estranjeiru ho nacionalidade Xina hamutuk na’in-lima iha área Hera tanba deskonfia envolve iha atividade ilegal iha tasi.

Komandante Unidade Polísia Marítima (UPM), Superintendente-Xefe Polísia Eugenio Pereira hateten, detensaun ne’e bazeia ba servisu informasaun husi UPM, Komandu Navál, koordenasaun ho komunidade no mós servisu informasaun husi país viziñu sira ne’ebé iha konektividade ho zona marítima.

“Segunda-kalan, hale’u tuku 23:00 Otl, ita simu duni informasaun husi ita nia komunidade sira iha área Hera no Metinaro nian, sira pasa informasaun kona-bá movimentu ró ne’e. Entaun ita depois lokaliza no halo kedas aproximasaun ba iha ró ne’ebé mak ita identifika duni ninia potensia ba aktu sira ne’ebé mak komete husi pesoal ne’ebé mak navega ró ne’e,” hatete Komandante UPM Superintendente-Xefe Polísia Eugenio Pereira ba jornalista sira iha edifisiu UPM, Lecidere, Tersa-ne’e.

Komandante UPM esplika, husi prosesu abordajen, autoridade identifika katak iha ró laran la iha dokumentu, tantu pesoal sira ne’ebé navega ró ne’e mós la iha dokumentu. No Liuhusi identifikasaun katak sidadaun estranjeiru no ró ne’ebé sira navega la iha dokumentu, ida-ne’e hanesan indisius ida ne’ebé bele fortifika autoridade Polísia.

Hafoin detein, UPM koordena kedas ho Diresaun Servisu Investigasaun Kriminál (DSIK) hodi entrega suspeitu na’in-lima ba sela detensaun hodi kontinua prosesu investigasaun.

“Informasaun ne’ebé mak mai husi ita nia membru sira, iha suspeitu na’in-lima mak ita asegura ona iha sela detensaun entrega ona ba servisu investigasaun kriminál sira mak halo detensaun,” tenik nia.

Superintendente-Xefe Polísia hatutan, prosesu sira ne’e DSIK sei kontinua no sei koordena mós ho Alfándega no Servisu Migrasaun (SM) hodi haree kompeténsia ida-idak ligadu ho aktu ne’ebé suspeitu sira komete.

Evidénsia sira ne’ebé autoridade halo apreensaun iha operasaun ne’e mak Ró unidade  ida, Karreta marka X-Trail ho númeru matrikula B.28.765-TL, router unidade  ida,  aparelu starlink ne’ebé instala iha ró laran  ida, inklui sasán seluk ne’ebé sidadaun estranjeiru tau iha ró laran hodi utiliza ba atividade.

Komandante UPM dehan, liuhusi investigasaun mak foin bele justifika sira nia atividade navegasaun durante iha zona marítima Timor-Leste nian, tanba iha terenu autoridade seguransa sira halo identifikasaun maibé sidadaun Xina na’in-lima ne’e la hatudu dokumentu ruma.

Aleinde ne’e, autoridade seguransa mós deskonfia sidadaun Xina sira ne’e  iha ligasaun atividade hatama sigaru ilegal ne’ebé PNTL detein ona iha fulan balun bá kotuk.

Observasun RAFA iha edifisiu UPM Lecidere, hatudu katak Komandante Jerál PNTL Komisariu Asistente Polísia Afonso dos Santos tun direta hodi haré ró ne’ebé UPM sira asegura iha área Hera, no lori mai tau iha edifisiu UPM Lecidere, Díli.

Jornalista: Juvinal Cabral dos Santos