PNTL Detein Sidadaun Estranjeiru Na’in-Hitu iha Fatuhada Deskonfia Envolve iha Rede Scam Call Centre

DSIK detein sidadaun estranjeiru na'in-hitu iha Fatuhada, Díli, deskofia envolve iha rede scam call centre, Segunda-kalan, 03 Agostu 2026.

Díli, 04 Agostu 2026 (RAFA.TL) – Polísia Nasionál Timor-Leste (PNTL), liu husi Diresaun Servisu Investigasaun Kriminal (DSIK), hamutuk ho Servisu Migrasaun no ekipa Intelijénsia, Segunda-kalan, haleu tuku 22:30 Otl, detein  sidadaun estranjeiru  na’in-hitu iha área Rafa, Fatuhada, Munisípiu Díli, tanba deskonfia halo envolve iha rede atividade ilísitu scam call centre.

Sidadaun estranjeiru na’in-hitu ne’e, kompostu husi na’in-ida (feto) ho nasionalidade Vietname no na’in-neen seluk (mane) ho nasionalidade Xina.

Operasaun ne’e hanesan parte husi esforsu kontinua autoridade kompetente Timoroan sira hodi kombate krime transnasionál no atividade ilísitu sira ne’ebé bele ameasa seguransa publika.

Iha operasaun ne’e, ekipa DSIK halo apreensaun ba  evidénsia sira ne’ebé deskonfia uza ba atividade scam call centre, inklui telemovel hamutuk unidade 20-resin, iPad tolu, Laptop ida, aparellu Starlink ida, pasaporte lima, no sidadaun rua seluk la iha pasaporte tanba dokumentu refere hela iha ajénsia ida.

Operasaun ne’e hala’o hafoin DSIK halo monitorizasaun no investigasaun durante loron balu, bazeia ba informasaun intelijénsia kona-bá movimentu suspeitu iha apartamentu ida iha Fatuhada.

Bainhira ekipa polísia tama ba lokal refere, suspeitu sira tenta subar evidénsia sira, maibé  durante revista, polísia konsege hetan objetu sira ne’e iha gaveta no iha kama okos.

DSIK lori sidadaun estranjeiru na’in-hitu ba Kuartel  Jerál PNTL, hodi hala’o identifikasaun no investigasaun.

Hafoin halo investigasaun, DSIK lori suspeitu sira ba iha sela detensaun Komandu Munisípiu Díli hodi kumpri detensaun durante oras 72, molok aprezenta ba Ministériu Públiku atu kontinua prosesu judisiál.

PNTL kontinua apela ba komunidade atu koopera ho autoridade sira, liu husi fó informasaun bainhira hare atividade suspeita iha sira-nia área.

PNTL mós afirma katak kooperasaun entre povu no polísia importante tebes atu prevene no kombate krime organizadu no krime transnasionál iha Timor-Leste.

 Jornalista: João Carlos