PNTL Detein Joven Na’in-Rua Deskonfia Halo Agresaun Fíziku Hasoru Pessoal Seguransa Vise-Ministru Justisa

PNTL detein joven na'in-rua iha área Colmera (TORRETO nia oin) tanba komete agresaun fiziku hasoru mambru CSP ida, Kuarta 16 Setembru 2026.

Díli, 16 Setembru 2026 (RAFA)- Polísia Nasionál Timor-Leste (PNTL) detein joven na’in-rua iha área Colmera, Díli, tanba deskonfia halo agresaun fíziku hasoru membru PNTL ida ne’ebé hala’o servisu hanesan seguransa pesoál (eskolta) ba Vise-Ministru Justisa.

Segundu Komandante PNTL Munisípiu Díli, Superintendente Luis da Silva, hatete katak insidenti ne’e mosu iha Kuarta dader-ne’e, bainhira membru polísia refere hala’o hela nia knaar to’o iha área Comera nian (TORRETO nian oin) maka Joven na´in-rua ne’e lakoi fó fatin atu liu, nune’e sira para tun deskute to’o baku malu.

Tuir informasaun ne’ebé PNTL simu husi sidadaun sira, membru polísia ne’e hetan atake husi joven na’in-rua. Hafoin simu informasaun, Polísia Eskuadra Veira Cruz halo kedas atuasaun no haruka ekipa ba fatin akontesimentu halo kapturasaun ba suspeitu sira.

“Ohin, oras tuku 09:30 Otl, mosu problema iha área ne’e, ne’ebé envolve joven na’in-tolu ka haat hanesan ne’e. Sira ataka ita-nia membru Polísia ne’ebé servisu iha CSP no fó seguransa ba Vise-Ministru Justisa. Bainhira ami simu telefone, Komandu orienta kedas ekipa Task Force atu tun ba terenu hodi halo kapturasaun, agora dadauk, ami entrega ona ba Investigasaun Kriminál Eskuadra Vera Cruz hodi halo prosesu investigasaun. Sira hatama ona iha sela durante oras 72 nia laran,” Superintendente Polísia Luis da Silva informa ba jornalista sira.

Superintendente Luis da Silva esplika, depois halo detensaun oras 72 ba joven na´in-rua ne’e, sei kontinua nia prosesu ba Ministériu Públiku hodi lori ba Tribunal tanba problema ne’e akontese flagrante delito.

“Hakarak ka lakohi, prosesu tenke ba Tribunal, tanba ida ne’e krime públiku, sidadaun na´in-rua ne´e ataka membru iha dalan ho hahalok ne’ebé la di’ak,” Nia lamenta.

Superintendente Polísia Luis da Silva mós hatete katak membru PNTL ne’e lori ba Hospital Nasionál Guido Valadares (HNGV) atu hetan tratamentu médiku tanba hetan agresaun fíziku. No PNTL Eskuadra Veira Cruz detein ona joven na’in-rua iha sela Komando PNTL Munisípiu Díli, atu hein prosesu investigasaun no prosesu jurídiku tuir lei.

Jornalista: João Carlos