PNTL Desmantela Tán Rede Scam Call Centre iha Bedois no Detein Sidadaun Estranjeiru Na’in-Hitu

PNTL desmantela tan atividade ilísitu scam call centre iha uma ida iha área Bedois, Díli. Imajen/Espesiál

Díli, 𝟏𝟗 J𝐮𝐥𝐥𝐮 𝟐𝟎𝟐𝟔 (RAFA.TL) – Ekipa konjunta Polísia Nasionál Timor-Leste (PNTL) liu husi Diresaun Servisu Investigasaun Kriminál (DSIK), Servisu Informasaun Polísia (SIP) ho Servisu Migrasaun (SM) desmantela tan rede atividade ilísitu scam call centre iha área Bedois, Suku Becora, Munisípiu Díli.

Informasaun ne’ebé RAFA.TL asesu husi autoridade Polísia Nasionál Timor-Leste katak iha Sábadu-ne’e, ekipa konjunta rekolla informasaun husi komunidade sira deskonfia atividade scam call centre iha uma ida iha área Bedois nian. Nune’e, autoridade sira halo  identifikasaun no lokaliza terrenu.

Hafoin ne’e, ekipa konjunta halo operasaun, buska no apreensaun ba lokal ne’ebé deskonfia pratika atividade jogu ilísitu no konsege identifika atividade rede scam call centre.

Iha  operasaun ne’e, ekipa konjunta halo apreensaun ba  objetu krime ne’ebe konsidera hanesan evidénsia teknolojia dijitál inklui detein sidadaun estranjeiru na’in-hitu (7), kompostu husi na’in-neen ho nasionalidade Indonézia (feto tolu no mane tolu) no Xinés mane ida.

David Menezes hanesan uma-na’in ne’ebé arrenda nia uma ba ema estranjeiru sira ne’e, informa katak iha fulan-ida liubá sidadaun estranjeiru kazál ida mak husu aluga nia uma, inklui sosa mobiliáriu uma laran nian no   instala aparelu STARLINK.

“Sidadaun  estranjeiru kazál ida ne’e mai arrenda uma ne’e besik fulan ida ona, no selu uluk fulan tolu nian, no kada fulan sira selu osan ho montante US$2500.00,” David Menezes haktuir.

Daudaun ne’e suspeitu na’in-hitu ho objetu krime sira ne’ebé autoridade sira halo apreensaun lori ona mai iha DSIK Kuartél Jerál PNTL hodi submete ba prosesu identifikasaun no investigasaun.

Jornalista: João Carlos/Editór: Vito Salvadór