PNTL Asegura Suspeitu Na’in-Rua Ba Kazu Hadau Karteira To’o Rezulta Nadine Lakon Vida

Polísia asegura suspeitu na'in-rua.

Díli, 08 Juñu 2026 (RAFA.TL)- Polísia Nasionál Timor-Leste (PNTL) asegura ona suspeitu na’in-rua ba kazu hadau karteira no telemovel iha área Praia dos Coqueiros, Díli, Domingu kalan (7/6/2026), ne’ebé rezulta vitíma feto na’in-rua; ida kanek todan no ida seluk lakon vida.

Autoridade Polísia asegura suspeitu na’in-rua ne’e iha área Tasi-Tolu, hale’u tuku 12:00 meiudia Otl, no asegura mós prova krime  motór ida ne’ebé suspeitu sira kondus hodi hadau vitíma ho naran istimadu Nadine ho nia bin rasik ne’ebé daudaun ne’e hala’o tratamentu intensivu iha HNGCV tanba ho kondisaun kanek todan.

Polísia transporta ona suspeitu na’in-rua ba iha Komandu Jerál Polísia Nasionál Timor-Leste (PNTL) iha Diresaun Servisu Investigaaun Kriminal hodi halo investigasaun no indentifikaaaun, no kumpri detensaun oras 72 iha sela komandu PNTL Munisípiu Díli, molok kontinua ba prosesu tuir mai.

Suspeitu naín-rua  ne’e alegadamente hanesan ema ne’ebé lori motór hodi hadau vitíma Nadine nia karteira no telemovel bainhira vitíma tula nia bin rasik ho motór liu iha área Praia dos Coqueiros, purvolta tuku 19 atu ba tuku 20:00 Otl.

Iha prosesu investigasaun parte PNTL deskobre mós katak motór ne’ebé autór sira kondus antes ne’e lakon iha área Kampung Baru, Aldeia 30 de Agosto, no suspeitu sira utiliza fali hodi halo asaltu iha área Praia dos Coqueiros.

Segundu Komandante PNTL Munisípiu Díli, Superintendente Polísia  Luis da Silva hatete membru sira husi komandu PNTL Munisípiu Díli  kontinua halo investigasaun kle’an atu identifika no buka tuir suspeitu sira ne’ebé involve iha kazu  hada’u telemovel ne’e.

Kornolojia ne’ebé daudaun ne’e parte polísia hato’o katak  bainhira vitíma kondus motór liu área Paria dos Coqueiros nian, suspeitu sira ho motór tuir husi kotuk no sertamente hada’u vitíma nia karteira ho telemovel iha laran.

“Kazu ida akontese iha Praia dos Coqueiros ne’e , suspetu sira konsege hada’u telemovel, entaun vitíma sira duni tuir depois to’o iha ne’ebá hetan asidente soke entaun ida tur iha kotuk ne’e hakotu nia iis, ne’ebé hodikalan kedas ita orienta  lori ba iha Mortuáriu HNGV, agora dadauk mate isin  ami tenta para intrega ba família, Superintendente Polísia  Luis da Silva informa ba jornalista.

Relasiona ho kazu ne’e, Komandu Polísia Díli alerta ba komunidade atu kolabora ho Polísia atu kombate kazu krime no evita  autór sira labele naok no  hadau tan ema nia sasán iha kapitál Díli, tanba kazu ikus ne’e mosu suspeitu sira aprovetia oportunidade hodi ataka ema  hadau  ema nia sasán .

Kazu ho natureza hanesan akontese dal aida ona iha área Praia dos Cocueiros iha kalan 22 fulan-Maiu tinan 2025, hale’u tuku 19:50 Otl.

Kronolójia akontesimentu momentu ne’ebá, sidadaun feto ida ho nia oan Nituchia Fangidae ho motorizada liuhosi área Kampung Alor, hakfodak mai, mosu suspeitu na’in-haat ho motór duni tuir hela sidadaun feto ne’e ho nia oan ho  objetivu atu hadau sira-nia telefone ne’ebé sikat hela iha motór inia bolsu oin.

Suspeitu sira konsege hadau sidadaun feto ne’e ninia telefone, nune’e sidadaun feto ne’e duni tuir kedan suspeitu na’in-haat no bainhira to’o iha Loja Sehara nian oin, área Praia dos Coqueiros, vítima  tenta hadau hikas nia telefone. Maibé, la konsege tanba  iha suspeitu ida mak ho nia motór halai hosi vítima sira nia kotuk, lori ai fai bá vítima nia motór, ikus mai vítima ho ho nia oan feto Nituchia Fangidae ho motór  monu ba alkatraun rezulta sira-na’in rua kanek grave no ikus mai Nituchia Fangidae, tinan hitu (7) lakon vida.

Jornalista: João Carlos/Editór: Vito Salvadór