PNTL Asegura Sidadaun Estranjeiru Na’in-Rua Hatama Coca-Cola Kaixa 138 ho Ró Ida, inklui Motór Jhonson Rua

PNTL asegura sidadaun estranjeiru na'in-rua ho prova sasán ilegal ne'ebé hatama mai Timor-Leste. Imajen/Média PNTL

DILI, RAFA.tl– Polísia Nasionál Timor-Leste (PNTL), liuhosi Unidade Polísia Marítima (UPM) iha Postu Atabae, halo operasaun iha tasi parte Beacou Atabae, Munisípiu Bobonaro, detekta sidadaun Indonézia na’in-rua ho inisiál RB ho GT, ne’ebé utiliza ró hodi hatama sasán ilegál hanesan Coca-Cola kaixa 138, ho ró ida, inklui motór Jhonson rua.

Notísia Relevante: PNTL ho F-FDTL Prende Fugetes Husi Dirijente SNI Na’in-rua

Porta-voz Komandu Jerál PNTL, Superintendente Polísia João Belo dos Reis hatete, suspeitu na’in-rua ne’ebé hatama sasán ilegál iha Beacou, Atabae ne’e, Komandu PNTL Munisípiu Bobonaro halo ona detensaun oras 72 molok aprezenta ba Tribunál  Judisiáriu Primeira Instánsia Maliana hodi halo prosesu Primeiru Interogatóriu.

“Operasaun ne’ebé husi UPM  halo iha parte Atabae, Beacou nian, detekta movimentu ró balun husi Indonézia tama iha teritóriu Timor-Leste, nune’e ekipa operasaun konsege prende sasán lubuk ida, kompostu husi Coca-Cola kaixa 138, motór jhonson rua no ró ida. Depois sira halo verifikasaun no identifikasaun koordena kedas ho parte Unidade Patrullamenu Fronteira (UPF) apezenta ba iha Ministériu Públiku Maliana hodi halo prosesu ba iha Tribunál. Suspeitu na’in-rua husi Atapupu- Indonézia ne’e detein tanba komete kríme flagrante de litu,” Superintendente Polísia João Belo dos Reis ba jornalista sira iha Komandu Jerál PNTL, Díli, Kinta (27/11/2025).

Evidénsia sira ne’ebé Polísia prende asegura ona iha komandu PNTL Munisípiu Bobonaro, no hein transporta ba Ministériu Públiku Bobonaro hodi prosesa ba iha tribunál.

Superintendente Polísia João Belo dos Reis husu mós ba estadu atu hadi’a  jestaun iha justisa tanba sasán ilegál sira ne’ebé Polísia prende hanesan karreta, bero, motór, sigaru, bébidas balun, ikus mai aprezenta ba Ministériu Públiku, to’o sasán sira-ne’e sai dodok no aat.

“Tanba ne’e presiza desizaun ida ne’ebé di’ak, bele halo hodi fa’an fila-fali ba ema sira ne’ebé presiza hodi hatama fali osan ba kofre estadu,” Nia hateten.

Reportajen ekipa Rafa.tl