PN Kontinua Hili José Belo Ba Prezidente CNE Períodu 2026-2031

Membru PN sira halo eleisaun ba Prezidente no membru CNT iha plenária PN, Kuarta 30 Setembru 2026.

Díli, 30 Setembru 2026 (RAFA)- Parlamentu Nasionál, liu husi plenária extraórdinariu,  Kuarta-ne’e, kontinua hili José Agostinho da Costa Belo Pereira ba Prezidente Komisaun Nasionál Eleisaun  (CNE) ba mandatu  períodu 2026-2031.

Iha submisaun kandidatura ne´ebé Bankada Parlamentár Partidu CNRT, PD no  KHUNTO submete liu husi leitura ne´ebé Deputada Bendita Moniz anunsia hatudu katak bankada tolu ne´e iha deit kandidatu unikú José Agostinho da Costa Belo Pereira.

“Kandidatu ne’ebé ami Bankada sira propoin mak  José Agostinho da Costa Belo Pereira ba Prezidente CNE, konfiante katak ita-boot sei fó atensaun no konsiderasaun, ami hato’o ami nia agradesimentu kle’an no respeitu ne’ebé aas,” hatete  Deputada Bendita Moniz.

Hafoin eleisaun, Prezidente Parlamentu Nasionál Maria Fernada Lay hatete maioria deputadu sira fó votu konfiansa ba Prezidente CNE atuál ba mandatu períodu ida tan.

“Rezultadu votasaun kontinua mantein ho numéru totál ne’ebé tuir votasaun 63, a-favór 45 kontra 15, no  abstensaun  tolu (3), hodi nune’e, kandidatu eskolla ona hot emu maioria votu validu,”  Maria Fernanda Lay deklara.

Parlamentu Nasionál halo mós votasaun sekretá ba pakote membru CNE ne’ebé  Parlamentu Nasionál hili hodi reprezenta Parlamentu Nasionál iha CNE mak hanesan José Agostinho da Costa Belo Pereira, Odete Maria Belo, Leonardo Amaral, António Amaral Ximenes , Paula Flamina da Silva Corte-Real Araújo, ho Zelia Fernandes, ho votasaun a-favór 59 , kontra rua (2), abstensaun ida (1) no votu nulu ida  (1).

Jornalista : Zita Menezes