PN husu Governu Aloká Orsamentu Ba Manutensaun Faro no Fasilidade Sira Seluk iha Portu Díli

Portu Díli.

Díli, 15 Jullu 2026 (RAFA.TL)- Parlamentu Nasionál husu ba Governu atu tau iha prioridade Orsamentu Jerál Estadu (OJE) 2027 kona-ba manutensaun Faro no fasilidade sira seluk iha Portu Díli hodi garante seguransa ba sidadaun hotu ne’ebé utiliza transporte Marítima.

Prezidente Komisaun E Parlamentu Nasionál ne´ebé trata asuntu Infraestrutura, Deputadu Marcos Xavier, iha audénsia públiku ho Autoridade APORTIL, Kuarta-ne´e, husu tenke halo manutensaun rutina faro (lighthouse) no fasilidade sira seluk ne’ebé fasilita movimentu ró nia iha Portu Díli.

Prezidente Komisaun E  afirma iha semana hira ba kotuk  Komisaun E halo fisklalizaun ba Munisípiu Ataúro, iha fatin ró atraka no identifiká fasilidade barak mak kondisaun ladún di’ak.

” Fasilidade sira ne’e tenke halo manutensaun rutina, labele ita hein avaria loos tiha mak foin hadi’a. Hanesan ita-boot sira hatete katak lampu faro sira ne’ebá avaria hotu tanba iha orsamentu 2026 la tau ho ida-ne’e mak ami husu ba sira para Orsamentu Jerál Estadu 2027 tenke tau,” Deputadu Marcos Xavier haktuir.

Deputadu ne’e mós preokupa katak bainhira fasilidade ne’e aat no liuliu hanesan faro sira kondisaun la di’ak bele fó mós impaktu ba iha movimentu ró sira.

“Sé lampu faro ne’e la lakan ró sira ne’e atu atraka halo nusa, maibé tanba iha ró sira ne’e mós iha ninia ema orienta oinsá mak ró ne’e bele atraka, maibé ró bele la’o nafatin mais tenke iha manutensaun, ” tenik nia.

Hatán ba kestaun ne’e Diretór Diresaun Servisu Transporte Maritima Cabutazen Nasionál Rolando Xavier hatete, lampu lighthouse ne’ebé avaria nia parte la bele fó komentáriu, tanba kompeténsia la’ós APORTIL nian, maibé parte Diresaun Nasionál Transporte Maritima (DNTM), nia responsavél.

“Ne’e ema bolu tripulante flexibility ne’ebé mak ró atu tama, ne’e kerdizér problema uituan, maibé hanesan APORTIL ami servisu hamutuk nafatin ho DNTM, liuliu ami nian Ministériu para bele hadi’a lalais navegasaun sira ne’e, la’ós iha lighthouse de’it, maibé navegasaun barak iha Atauro iha Oe-Cusse iha Kosta Sul iha area tasi sira ne’e navegasaun,” hatete Dretór Rolando Xavier.

Jornalista: Zita Menezes/Editór: Vito Salvadór