PN Despede no Fó Omenajen Ikus Ba Prezidente Asembleia Konstituente no eis-PPN Saudozu Francisco Guterres “Lú-Olo”

Parlamentu Nasionál (PN), liu husi Bankada Parlamentár CNRT, PD, FRETILIN, KHUNTO no PLP halo depedida no fó omenajen ikus ba Saudozu Prezidente Asembleia Konstituente, no eis- Prezidente Parlamentu Nasionál Francisco Guterres “Lú-Olo” , Sesta 26 Juñu 2026.

Díli, 26 Juñu 2026 (RAFA.tl)- Parlamentu Nasionál (PN), liu husi Bankada Parlamentár CNRT, PD, FRETILIN, KHUNTO no PLP halo depedida no fó omenajen ikus ba Saudozu Prezidente Asembleia Konstituente, no eis- Prezidente Parlamentu Nasionál Francisco Guterres “Lú-Olo” hodi hanoin memoria no kontribuisaun hamutuk ho legadu sira ne´’ebé saudozu husik hela iha prosesu tomak konstrusaun Estadu Republika Demokrátika Timor-Leste nian.

Xefe Bankada CNRT Deputadu Patracino dos Reis Fernandes, iha sesaun solene plenária PN, Sesta (26/06/2026), liuhosi intervenzaun Bankada CNRT hatete  iha momentu triste ida-ne’e CNRT lori Bankada nia naran, lori Partidu CNRT nia naran husi Prezidente Partidu, sekretaiu jeral no kuadru militante Partidu CNRT tomak hakarak partilla kondélensia ne’ebé kle’an ba inan faluk no oan ki’ak sira, familia boot Ossu Viqueque no ba povu Timor-Leste tomak ba estadu nasaun nomós ba Partidu FRETILIN.

“Ita hotu sente triste no lakon figura importante tebes iha ita hotu nian leet, iha momentu ne’e mós lori ami htu ne’ebe ohin temi naran hakarak atu hato’o de’it ami nian agradesimentu no obrigadu la hotu ba sakrafisiu no legadu tomak ne’ebé aman maun Doutor Francisco Guterres “Lú-Olo” fó rai doben Timor-Leste fó ba povu Timor-Leste, Iha faze rezisténsia ba ukun rasik aan, nomós iha tempu konsilidasaun ba instituisaun estadu demokratikú iha estadu soberanu Repúblika Demokratikú Timor-Leste,” hatete Deputadu Patracino Fernandes.

Deputada PD Sancha Margarida Tilman, liuhhosi intervensaun Bankada PD hatete, “ohin exelénsia kamarada Prezidente mai fali iha uma fukun Parlamentu Nasionál, la’ós atu servi povu no estadu Timor-Leste, maibé ho silénsiu hatodan aan iha plenária solene ida-ne’e atu haksumik aan internalmente iha Parlamentu Nasionál no nasaun Timor-Leste.” Nia sublina.

Xefe Bankada FRETILIN Aniceto Lounginhos Guterres Lopes liuhosi intervenzaun Partidu Bankada FRETILIN hatete, Bankada FRETILIN senti laran susar tebes, tanba lakon husi ita nia leet lidér Timoroan ida Doutor Francisco Guterres “Lú-Olo.

“Lú-Olo dedika nia vida tomak ba auto determinasaun no ba konstrusaun estadu direitu demokratikú, ninian amegasaun plureza no integridade, esperitu unidade nasionál, no servisu ho dedikasaun halo nia sai lidér ida insubtituida ne’ebé sei hela nafatin iha FRETILIN nia fuan no iha povu Timor-Leste tomak nia memoria,”tenik Deputadu Aniceto Guterres.

Xefe Bankada KHUNTO Deputadu Antonio Verdial de Sousa liuhosi intervenzaun Bankada KHUNTO hatete, nu’udár responsavél Bankada Parlamentár KHUNTO  iha uma fukun ida-ne’e hodi kuadru militante husi nasionál to’o baze nia naran hato’o hotu-hotu nia sentidu kondelénsia ne’ebé kle’an tebes.

“Maibé ita nia omenajén hela de’it ho liafuan furak retoriká Parlamentár ninian, ita nia omenajén tenke transforma asaun no dignidade, tanba ne’e husi plenária ida-ne’e ho kualidade hanesan Deputadu ho laran hakraik aan husu ba estadu nu’udár obrigasaun moral, no istoriká atu garante katak feto faluk no oan ki’ak sira husi saudozu doutor Lú-Olo moris ho dignidade hetan sasin no apoiu sira nian moris hetan seguransa no respeitu ne’ebé sira merese,”hatete Deputadu Antonio Verdial de Sousa.

Xefe Bankada PLP Deputada Maria Angelina Sarmento liuhosi intervensaun Bankada PLP hato’o sentidu kondelénsia ba Saudozu Francisco Guterres “Lú-Olo” oan kiak sira no familia boot Guterre no Nobre no kuadru politiku Partidu FRETILIN.

“Iha momentu tristeza ida-ne’e Bankada PLP hato’o ami nia sentidu kondelénsia klean ba familia lutada no ba ema ne’ebé fahe lasu ran amizade no luta hamutuk ho saudozu iha falentil  ba auto determinasaun nune’e mós ba FRETILIN no povu Timor-Leste en jeral ne’ebé ohin loron halerik ho mataben tanba lakon sira nia figurano estadista ida,”dehan  Deputada Maria Angelina Sarmento.

Iha despedida ikus iha Parlamentu Nasionál ne’e partispa mós husi Vise Primeiru-Ministru Mariano Assanami Sabino ho membru Governu sira hodi fó mós sira nia omenajén ikus iha uma-fukun Parlamentu Nasionál.

 Jornalista : Zita Menezes/Editór: Vito Salvadór