PMKRI Akuza TNI Envolve Fasilita Atividade Kontrabandu iha Liña Fronteira RI-RDTL

Polísia Belu, Korpu Brigada Movel (Brimob) no Forsa Armada Nasionál Indonézia (TNI) iha Laktutus Hala’o Patrullamentu Konjunta Hodi Garante Seguransa iha Fronteira RI-RDTL. Imajen/dok.rri

Kefamenanu, 17 Abríl 2026 (RAFA.tl)– Asosiasaun Estudante Katólika Indonézia (PMKRI) Kefamenanu akuza  Forsa Tarefa Seguransa Fronteira Forsa Armada Nasionál Indonézia  (TNI/Tentara Nasional Indonesia) deskonfia fasilita atividade kontrabadun iha liña fronteira terrestres Repúblika Indonézia (RI) ho Repúblika Demokrátiku Timor-Leste (RDTL).

Liu husi Prezidium Movimentu Komunitáriu (GERMAS), Kuarta 15 Abríl 2026,  iha Kefamenanu, Yohanes Niko Seran Sakan, reprezenta  Asosiasaun Estudante Katólika Indonézia hato’o preokupasaun ne’ebé kle’an no seriu kona-ba atividade illegal ne’ebé aumenta ba beibeik iha liña fronteira terrestres RI-RDTL.

Asosiasaun Estudante Katólika Indonézia konsidera   prátika kontrabandu iha área fronteira entre Munisípiu Timor Sentrál Norte (TTU)-Indonézia ho Rejiaun Administrativu Oé-Cusse Ambeno (RAEOA), Timor Leste, deskonfia maka’as fasilita husi forsa TNI sira.

Kontrabandu ne’ebé buras ba merkadoria oioin, hahú hosi kombustível no pekuária to’o sándalu, osan-mean no seluk-seluk tan.

Yohanes Niko Seran Sakan espesifikamente destaka kona-bá alegasaun envolvimentu hosi indivíduu sira hosi TNI iha Setór Oeste, Yonarhanud 2 Kostrad. Tuir nia, ofisiál balun deskonfia la’ós de’it admite atividade kontrabandu  ne’e akontese, maibé mós hala’o papél estratéjiku ida hodi fasilita dalan sira kontrabandu nian.

“Envolvimentu ne’e alegadamente inklui koordenasaun ba pontu sira kontrabandu nian no fornese dalan asesu seguru sira ba autór sira. Ida-ne’e hanesan traisaun ida ba TNI sira-nia devér hodi proteje soberania nasionál,” Yohanes afirma.

Asosiasaun Estudante Katólika Indonézia  Kefamenanu avalia katak kontrabandu, liuliu kombustível, hanesan problema ida ne’ebé boot liu. Iha indikasaun maka’as katak rede ne’e mós iha afiliasaun ho sindikatu tráfiku umanu organizadu ida.

Haré ba ameasa sira-ne’e nia gravidade, Asosiasaun Estudante Katólika Indonézia Kefamenanu kompromete lori asuntu ida ne’e ba atensaun governu sentral iha Jakarta. Pasu ida ne’e foti atu garante aplikasaun lei ne’ebé transparente iha área sira fronteira RI hanesan  husi Wini, Napan, Inbate, to’o Mutis.

Insidente ida iha loron 07 fulan-Abril tinan 2026, iha fronteira Napan nian nu’udár prova forte bainhira  komunidade sira hetan gazoleu litru 35 iha tuku 6:00 dadeer Oras Indonézia Osidentál, maibé la identifika autór

Husi sorin seluk, dadus Unidade Patrollamentu Fronteira (UPF) nian ne’ebé Rafa.tl asesa hatudu iha tinan 2025, Polísia Nasionál Timor-Leste (PNTL) nia Unidade Patrolamentu Fronteira (UPF) kontinua intensifika operasaun hodi apreende sasan kontrabandu sira iha liña fronteira Timor-Leste no Indonézia.

Tuir informasaun katak apreensaun ba sasan sira kontrabandu  durante tinan 2025 mak hanesan iha fulan-Marsu 2025, UPF halo apreensaun ba  roupa uzadu (OB) iha karón 26 iha área Batugadé, Munisípiu Bobonaro.

Iha semana daruak fulan-Marsu  2025, UPF hamutuk ho TNI (Tentara Nasional Indonesia) apreende sigarru hamutuk karton 27 iha semana daruak fulan-Marsu 2025.

Iha fulan-Juñu 2025, Diresaun Servisu Investigasaun Kriminál (DSIK) hamutuk ho ekipa konjunta detein sidadaun ida ne’ebé lori tabaku marka “Joker” karton 50 (500 slop) ho kategoria ilegál iha área Tibalau, Guguleur, Liquiça.

Komandante UPF, Superitendente Xefe Polísia Euclides Belo hateten katak sasán hirak-ne’e tenta hatama ilegál husi Indonézia mai Timor-Leste no UPF kontinua halo patrullamentu rutina no koordenadu atu prevene atividade kriminál sira iha fronteira Timor-Leste nian.

Jornalista: João Carlos/Editór: Vito Salvadór