PM Xanana Husu Foin-sa’e Sira Halo Leitura Barak Hodi Hasa’e Koñesimentu

Lansamentu livru rua ho títulu “Entre Pensar, Dizer e Agir Uma Hermeneutica do Legado Vivo de Kay Rala Xanana Para o Futuro de Timor-Leste no Etika Penderitaan, Memori Dan Harapan Kay Rala Xanana Gusmão, Simone Weil Dan Rekonstrusi Moral Timor-Leste”, Tersa 11 Agostu 2026.

Díli, 11 Agostu 2026 (RAFA)- Primeiru Ministru (PM) Xanana Gusmão, husu ba foin-sa’e sira atu halo leitura (lee) barak hodi aumenta koñesimentu, la’ós buat kiik-boot ba husu deit ba Google tanba ida-ne’e sei estraga mentalidade atu aprende ba moris.

Xefe ezekutivu  hato’o afirmasaun ne’e iha serimónia lansamentu livru rua  ho títulu “Entre Pensar, Dizer e Agir Uma Hermeneutica do Legado Vivo de Kay Rala Xanana Para o Futuro de Timor-Leste no  Etika Penderitaan, Memori Dan Harapan Kay Rala Xanana Gusmão, Simone Weil Dan Rekonstrusi Moral Timor-Leste”, Tersa-ne’e, iha Auditóriu Semináriu Balide, Dili.

“Ha’u mai la’ós tanba buat at ne’ebá ne’e lae, ohin, ita hotu akompaña ko’alia kona-bá profesór Martinho Borromeu nia fó livru mai ha’u lee, ha’u hakfodak la’ós tanba ko’alia kona-bá Kay Rala Xanana. Ida-ne’e mak atu husu ba joven sira ha’u la liuhusi Universidade, uluk Universidade la iha ami buka aprende, buka kompriende hatene tanbasá, tanba leitura  (lee), labele tuir de’it mak Google ne’e estraga imi nia mentalidade, estraga imi nia hanoin no hasai  imi nia isin no kbiit atu sai ema ne’ebé matenek,” Xanana Gusmão hateten.

Xefe Governu hatutan, nia iha de’it nivél ensinu sekundariu, maibé liu husi halo leitura, halo nia koñesimentu aumenta no lori nia ba pensamentu krítiku sira ba rekonstrusaun estadu no hatoman an leitura ne’e mak profesór Martinho Borromeu hatudu iha livru ne’e.

“Ha’u hakfodak, ha’u  kaer livru rua ne’e mai, ha’u lee atu soe tiha, Lae! lee to’ok lai, ha’u lee ikus fali mak ha’u kompriende foin temi filozofia, filozofia ne’e importante tebe-tebes nivél ensinu sekundariu ne’e, karik iha Dare ne’ebá ami latama dalan filozofia ninian.  Filozofia mak halo ita nia hanoin la’o, ha’u husu ba ita boot sira ho imi ki’ikoan sira lee livru rua ne’e la’ós atu haré bá ha’u, ha’u ne’e lavale buat ida, ema nia aman ne’e mak foti ha’u nia naran mais ha’u ne’e lavale buat ida,” Xanana hateten

PM  Xanana apresia lee livru ne’e, tanba  livru ne’e nia temi filozofia, nia temi etika no kaer ema sira ne’ebé filozofu hakerek kona-ba livru sira-ne’e hotu.

Xanana Gusmão subliña apresia tebe-tebes livru rua ne’e, sé apresia liu hasai tiha Kay Rala Xanana furak liu, tanba la temi dehan katak nia kaer kilat tinan sanulu ida-ne’e Erói, ka nia ba toba hela iha universidade dapur mak Cipinan ne’e, tanba tein mesak ne’ebé halo universidade dapur.

“Ha’u admira ita boot la’ós tanba ko’alia kona-ba ha’u, ha’u admira tanba bele lee no bele kompriende.” Xanana Gusmão louva.

Iha fatin hanesan hakerek nain ba livru rua-ne’e Profesór Martinho Borromeu hateten, hahú konversa pesoal ho Kay Rala Xanana lori nia ba iha opsaun rua ka hakerek kona-bá Kay Rala Xanana nia istória hanesan baibain ema konta kona-bá kaer kilat ida-ne’e ka pontu devista ohin temi filozofia mais siénsia naran Hermeneutika ne’e dehan halo interpretasaun ba akontesimentu ne’ebé liu tiha ona.

Autor livru ne’e esplika  livru rua, ida mak “ Etika Penderitaan, Memori Dan Harapan Kay Rala Xanana Gusmão, Simone Weil, Dan Rekonstrusi Moral Timor-Leste” ne’e haré husi 75 mais lakonta nia funu hare ba nia akontesimentu hotu-hotu. No ida seluk mak ho títulu “Entre Pensar, Dizer e Agir Uma Hermeneutica do Legado Vivo de Kay Rala Xanana Para o Futuro de Timor-Leste” ne’e kona-bá kronolojia 75 arkivu kona-bá nia la’ós hanesan istória maibé ne’e anexu de’it. Iha livru ne’e tomak haré espiritu husi dokumentu sira ne’e saida para ba ita atu aprende.

“Ha’u lee istoria Timor, ita hotu-hotu lee, ita hotu-hotu rona, ha’u dehan ona katak ita nia maun boot sira seluk hakarak mós ha’u bele kontribui ha’u nia hanoin hodi hakerek. Mais pelumenus naton ona hanesan Kay Rala Xanana bele ita trata hanesan baibain ema trata iha Facebook mais ita iha opsaun seluk bele hakerek buat ruma ko’alia kona-ba nia hanoin iha mundu,” Profesór Martinho Borromeu hateten.

Eskritor ne’e subliña livru rua ne’e hakerek kuaze lori tinan rua, utiliza nia salariu rasik hodi hakerek livru ne’e iha versaun tolu, língua Portugés, Indonézia no Inglés.

Ba futuru nia sei hakerek tan seluk, dadaun livru rua ne’e nia prodús hamutuk 180 hodi fahe de’it, maibé la fa’an.

Jornalista: Juvinal Cabral dos Santos