Ouvir RAFA Ritmo, Voz e Coração de Timor
PM Xanana Gusmão partisipa iha serimónia lansamentu levantamentu dadus jeofíziku no jeotékniku ba konstrusaun kadoras husi Greater Sunrise no Bayu-Undan iha Portu Tibar, Kuarta 11 Novembru 2026.
Díli, 12 Novembru 2026 (RAFA) – Primeiru-Ministru (PM), Kay Rala Xanana Gusmão, konfirma katak rekursu mina no gás iha kampu Bayu-Undan seidauk hotu ka maran, no kontratu produsaun ho kompánia explorador sira mak termina nune’e labele kontinua produsaun.
Xefe Governu halo deklarasaun ne’e iha serimónia lansamentu levantamentu dadus jeofíziku no jeotékniku ba konstrusaun kadoras husi Greater Sunrise no Bayu-Undan mai Natarbora, ne’ebé hala’o iha Portu Tibar, Kuarta-ne’e.
“Ohin temi Bayu-Undan, bain-bain ne’e ideia ne’ebé Parlamentu iha no hatene ona katak Bayu-Undan mina laiha ona, maran tiha, hotu ona. Problema la’ós Bayu-Undan maran tiha ona, maibé kontratu sira atu esplora ne’e hotu ona. Maibé iha kraik (tasi-okos) ne’ebá sei iha,” afirma Primeiru-Ministru Kay Rala Xanana Gusmão.
Xefe Governu esplika inisiativa atu estuda no konstrui kadoras husi Greater Sunrise no Bayu-Undan ba Natarbora nu’udar parte husi vizaun Governu nian atu aproveita rekursu naturál sira ne’ebé sei iha, no lori benefísiu ba dezenvolvimentu nasaun.
Xanana subliña projetu ne’e la’ós planu atu realiza kedas iha tempu badak, maibé presiza liu husi prosesu estudu no implementasaun ne’ebé hala’o etapa ba etapa, to’o hetan solusaun no dalan ne’ebé apropriadu.
Governu iha ona hanoin no vizaun klaru kona-bá projetu ne’e, nune’e gastu osan ba estudu no levantamentu dadus la’ós atividade ne’ebé laiha objetivu. Antes ne’e bolu ona Kompañia refere iha tinan 2012 mai haree hodi identifika no ikus iha duni nia rejultadu.
Hafoin estudu sira remata no determina ona, Xanana hateten, dalan ne’ebé di’ak liu, sei iha parte seluk ne’ebé bele kontinua prosesu konstrusaun kadoras ne’e.
Jornalista: João Carlos
Written by: RafaFM
PM Xanana: Bayu-Undan Sei iha Mina no Gás
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt