PM Xanana Apresia Servisu Intelijénsia ho Alfándega Mantein Vijilánsia Másimu

PM Kay Rala Xanana Gusmão. Imajen/Rafa.tl

DILI, RAFA.tl–Primeiru-Ministru (PM), Kay Rala Xanana Gusmão, apresia servisu intelijénsia ho servisu Autoridade Aduaneira ka Alfándega ne’ebé konsege deteta no identifika involku bidon-tolu no projétil iha karól semente fatin-tolu ne’ebé tama ilegalmente mai iha Portu Tibar, Postu Administrativu Bazartete, Munisípiu Liquiça.

Primeiru-Ministeru husu atu autoridade seguransa mantein vijilánsia hodi asegura Timor-Leste husi krime organizadu.

“Ita tenke apresia ba esforsu husi intelejénsia husi Alfándega no husi parte hotu,” Primeiru-Ministru Kay Rala Xanana Gusmão ba jornalista sira hafoin enkontru semanal ho Prezidente Repúblika José Ramos-Horta iha Palásiu Prezidensiál, Kinta (16/10/2025).

Primeiru-Ministru haktuir situasaun sira ne’e mak buat barak tenke foku ba iha seguransa, tanba ne’e mak di’ak tebes bainhira sira deteta involku ho projétil bidon-tolu ne’e. Nune’e,

Nia husu autoridade seguransa atu tau atensaun ba ró ne’ebé autoridade marítima no portuáriu sira halo averiguasaun iha tasi-klaran hodi kontrola labele iha tranzaksaun ilegál ka hasai sasán ilegál sira ne’ebé iha ró laran.

“Ha’u bolu hela atensaun ba ró metan ida ne’e kalan-kalan hafuhu took loron ruma ba hasai sasán karik tanba problema ida ne’e mak dalaruma ita hanoin katak ita tur de’it buat sira ne’e akontese, lae, tenke nafatin ezize ba instituisaun estadu ne’ebé kaer siguransa ka kaer ida-ne’e atu ita redus kriminalidade no krime transnasional iha ita-nia rai,” Xefe Governu Timor-Leste ne’e tenik.

Atu fó hanoin fali katak, involku bidon-tolu ho projétil semente fatin tolu ne’e, autoridade seguransa, liuhosi servisu nasionál intelijénsia deteta iha Portu Tibar  tama husi fatin orijen Estadus Unidus Amérika liuhosi Singapura no distinsaun ikus iha Timor-Leste.

Reportajen ekipa Rafa.tl