PM Xanana Apresia Involvimentu Reinu Unidu iha ASEAN no Apoiu Dame iha Rejiaun

PM Xanana halo durante enkontru bilaterál ho Sub-Sekretária Estadu Parlamentár Reinu Unidu no Ministra bá Indo-Pasífiku, Seema Malhotra, iha Otél Meliã Hanoi, Vietname, Tersa 9 Juñu 2026.

Díli, 10 Juñu 2026 (RAFA.TL)– Primeiru-Ministru (PM), Kay Rala Xanana Gusmão, apresia involvimentu Reinu Unidu iha The Association of Southeast Asian Nations (ASEAN) no ninia apoiu ba dame, estabilidade no prosperidade iha rejiaun Sudeste Aziátiku.

Apresiasaun ne’e PM Xanana hato’o durante enkontru bilaterál ho Sub-Sekretária Estadu Parlamentár Reinu Unidu no Ministra bá Indo-Pasífiku, Seema Malhotra, iha Otél Meliã Hanoi, Vietname, Tersa (9/6/2026).

“Ha’u sente kontente atu hasoru ita-boot iha Hanoi, Vietname. Timor-Leste valoriza ninia relasaun ho Reinu Unidu no fiar katak ita bele hametin ita-nia kooperasaun. Ami apresia Reinu Unidu nia involvimentu ho ASEAN no interese hodi apoia dame, estabilidade no prosperidade iha Sudeste Aziátiku,” PM Xanana hateten.

Primeiru-Ministru konsidera adezaun Timor-Leste bá ASEAN nu’udár realizasaun istóriku ida bá povu timoroan, hodi reflete aspirasaun nasionál ne’ebé iha ona durante tinan barak.

Nu’udar membru foun ASEAN nian, Timor-Leste komprometidu atu sai parseiru ne’ebé konstrutivu, responsável no ativu. Timor-Leste hakarak kontribui bá esforsu ASEAN nian hodi promove páz, diálogu, kooperasaun ekonómika no dezenvolvimentu inkluzivu.

PM Xanana rekoñese katak, partisipasaun efetiva iha ASEAN presiza kapasidade, esperiénsia no parseria forte. Tanba ne’e, Governu Timor-Leste kontinua simu apoiu hosi parseiru dezenvolvimentu sira atu fasilita integrasaun liután bá organizasaun rejionál ne’e.

Atualiza mós katak, Timor-Leste daudaun prepara hela bá responsabilidade sira iha futuru iha ASEAN, inklui prezidénsia ASEAN iha tinan 2029.

Primeiru-Ministru simu ho satisfasaun Reinu Unidu nia prontidaun atu apoia Timor-Leste iha dezenvolvimentu ekosistema Intelijénsia Artifisiál (IA) no enkuadramentu governasaun relevante.

Xanana Gusmão agradese Reinu Unidu tanba komunidade timoroan ne’ebé daudaun hela no servisu iha Reinu Unidu no Irlanda Norte. Prezensa komunidade ne’e sai ponte importante ida hodi hametin relasaun amizade entre nasaun rua, no kontribui mós bá ekonomia Timor-Leste.

Akompaña Primeiru-Ministru iha enkontru bilaterál ne’e Ministru Negósiu Estranjeiru no Kooperasaun, Bendito dos Santos Freitas; Vise-Ministra bá Asuntu ASEAN, Milena Maria da Costa Rangel; no Xefe Gabinete Primeiru-Ministru, Elizabeth Exposto.

Jornalista: Elio dos Santos/Editór: Vito Salvadór