PM Singapura Simu Kondekorasaun Grande Colar Ordem Timor-Leste no Promete Kontinua Apoia Dezenvolvimentu Nasionál

Primeiru-Ministru Singapura, Lawrence Wong, , simu kondekorasaun Grande Colar Ordem Timor-Leste husi Prezidenti Repúblika, José Ramos-Horta, Sesta 03 Jullu 2026.

Díli, 03 Jullu 2026 (RAFA.TL) – Primeiru-Ministru Singapura, Lawrence Wong, Sesta (3/07/2026), iha Palásiu Prezidénsial, simu kondekorasaun Grande Colar Ordem Timor-Leste husi Prezidenti Repúblika, José Ramos-Horta.

Wong simu kondekorasaun ne’e ho umildade no gratidaun boot, no promete kontinua apoia dezenvolvimentu Timor-Leste.

Depois serimónia atribuisaun ofisiál ne’e, Wong dehan katak nia simu kondekorasaun ne’e la’ós ba nia aan rasik, maibé ba Singapura no povu Singapura sira ne’ebé kontribui ba amizade entre nasaun rua, no mós povu Timor-Leste ne’ebé simu sira ho amizade, jenerozidade no bondade.

Wong lembra kooperasaun entre nasaun rua, no dehan katak Singapura akompaña Timor-Leste iha etapa oioin ba konstrusaun nasaun liuhusi kooperasaun téknika, dezenvolvimentu kapasidade no troka esperiénsia entre povu rua.

Tuir Primeiru-Ministru Singapura  ne’e orgullu tanba fó ona formasaun ba timoroan liu 1.300 iha programa sira. Nia mós refere adezaun foun Timor-Leste ba ASEAN hanesan membru plenu.

“Singapura kontinua kompromete atu apoia dezenvolvimentu no susesu Timor-Leste,” Wong hateten hodi akresenta  tan katak relasaun entre nasaun rua bazeia ba aprendizajen mútua no respeitu malu.

Primeiru-Ministru  Wong mós elojia istória Timor-Leste, no dehan futuru nasaun ida la depende de’it ba nia tamanho ka rekursu naturál, maibé ba korajen husi nia povu, forsa iha konviksaun sira no kapasidade atu supera difikuldade.

Tuir Wong, kualidade sira ne’e mak define istória Timor-Leste no kontinua inspira ema hotu-hotu.

Kona-bá adezaun Timor-Leste ba ASEAN, Wong konsidera ida-ne’e hanesan kapitulu foun importante ba Timor-Leste,  ba ASEAN no relasaun entre nasaun rua no garante katak Singapura hakarak servisu hamutuk ho Timor-Leste atu promove dame, estabilidade no prosperidade iha rejiaun.

Ba Prezidenti José Ramos-Horta, Wong dehan katak nia simu kondekorasaun ne’e ho gratidaun boot. Nia subliña katak onra ne’e fó liután determinasaun ba Singapura no Timor-Leste atu hametin amizade no kontinua servisu hamutuk ba benefísiu povu rua iha futuru.

Jornalista: Zita Menezes/Editór: Vito Salvadór