PM Lawrence Wong ho Delegasaun To’o Ona iha Timor-Leste

Primeiru-Ministru Singapura Lawrence Wong halo nia vizita ofisiál mai Timor-Leste, Kinta 02 Jullu 2026.

Díli, 02 Jullu 2026 (RAFA.TL)- Primeiru-Ministru Singapura Lawrence Wong  ho nia delegasaun to’o ona Timor-Leste ho jet privadu iha Aeroportu Internasionál Prezidente Nicolau Lobato iha oras tuku  15: 50 Otl.

Vizita Primeiru-Ministru Lawrence Wong mai Timor-Leste ne’e hanesan vizita ofisiál da-huluk Primeiru-Ministru Singapura nian iha istória Timor-Leste nian.

vVizita ofisiál Primeriu-Ministru Lawrence Wong akompaña mód husi Ministru Finansa Singapura nian ne’ebé sei hala’o vizita durante loron rua hahú husi loron 02 to’o 03 fulan-Jullu 2026.

Iha Aeroportu, Primeiru-Ministru Singapura Lawrence Wong simu direta husi Prezidente Repúblika, José Ramos-Horta ho Primeiru-Ministru Kay Rala Xanana Gusmão akompaña mós husi Vise-Primeiru-Ministru Francisco Kalbuadi Lay no Vise-Primeiru Ministru Mariano Assanami Sabino  ho membru Governu sira.

Prezensa PM Lawrence Wong simu ho dansa tradisionál no tara tais nu’adar símbolu domin, respeita no amizade.

Husi Aeroportu Internasionál Prezidente Nicolau Lobato, Primeiru-Ministru Lawrence Wong transporta direita husi Prezidente Repúblika José Ramos-Horta ho karreta mini moke no akompaña husi Primeiru-Ministru Kay Rala Xanana Gusmão hodi mai iha fatin deskansa Otél Palm Spring, Fatuhada-Díli.

Iha dalan protokolu sira hahu husi areador Aeroportu  nian, Primeiru-Ministru Singapura Lawrence Wong ho delegasaun simu bem-vindu direita husi estudante sira hamutuk ho profesór sira no inan-aman sira ne’ebé akompaña ho basa-lima ho viva no haklalak hodi kaer mós imajen  sira Primeiru-Ministru Singapura Lawrence Wong nian hamutuk ho bandeira Singapura no Timor-Leste, inklui mos bandeira ASEAN ne’ebé hatudu unidade rejionál iha Sudeste Aziátiku.

Delegasaun ne’e mós akompaña direita husi seguransa sira ba alta entidade husi F-FDTL Unidade Polísia Militár, PNTL unidade Espesial no mos unidade tránzitu ne’ebé asegura komboiu too iha fatin deskansa.

Tuir ajenda ofisiál ne’ebé Rafa.tl asesu, Primeiru-Ministru Singapura Lawrence Wong sei iha enkontru bilaterál ho Prezidente Repúblika José Ramos-Horta iha Palásiu Prezidensiál Nicolau Lobato Bairu-Pite, sesta (03/07/2026), no sei simu mos kondekorasaun ho Grau Kolár Orden Timor-Leste hafoin ne’e sei iha mos konferénsia imprensa ba média nasionál no internasionál sira iha Palásiu Prezidensiál Nicolau Lobato Bairu-Pite.

Hafoin husi Palásiu Prezidensiál, Primeiru-Ministru Singapura Lawrence Wong kontinua ba Palásiu Governu hodi hasoru malu ho nia omologu Primeiru-Ministru Kay Rala Xanana Gusmão iha Palásiu Governu Díli, no sei assina mos memorandu entendimentu ida hafoin kontinua ho konferénsia imprensa hamutuk ba média.

Hafoin enkontru bilaterál sira sei iha mós  han meiudia ofisiál molok Primeiru-Ministru Singapura Lawrence Wong ho delegasaun fila hikas ba Singapura.

Jornalista: Zita Menezes/Editór: Vito Salvadór