PM Interinu Afirma Jerasaun Foun Tenke Kaer-Metin Legadu Husi Saudozu Lú-Olo

Primeiru-Ministru Interinu nu’udár mós Vise-Primeiru Ministru, Ministru Koordenador ba Asuntu Sosias no Dezenvolvimentu Rural no Abitasaun Komunitaria Mariano Assanami Sabino reprezenta Governu simu maktoban Francisco Guterres Lú-Olo bainhira ho aviaun Aero Dili to'o iha Timor-Leste, 23 Juñu 2026.

Díli, 23 Juñu 2026 (RAFA.TL)- Primeiru-Ministru Interinu nu’udár mós Vise-Primeiru Ministru no Ministru Koordenador ba Asuntu Sosias no Dezenvolvimentu Rural no Abitasaun Komunitaria Mariano Assanami Sabino, konsidera Saudozu Francisco Guterres Lú –Olo nu’udar lider ne’ebé uniku no la ko’alia barak, tanba ne’e jerasaun foun tenke kaer-metin legadu no prinsipiu ne’ebé saudozu husik hela.

Vise-Primeiru-Ministru, Ministru Koordenador ba Asuntu Sosias no Dezenvolvimentu Rural no Abitasaun Komunitaria Mariano Assanami Sabino, hatoo nia deklarasaun ne´’ hafoin reprezenta IX Governu Konstituisionál presta omenajen ba Saudozu Francisco Guterres Lú-Olo iha nia rezidensia Farol, Díli, Tersa (23/06/2026).

“Saudozu Fransisco Guterres Lú-Olo lider gerilleiru ida ne’ebé maka pasiensia, lider ida ne’ebé simples, sempre konsistensia iha nia desizaun tomak, Lider ida ne’ebé espesial no uniku la ko’alia barak,” Mariano Assanami Sabino haktuir.

Primeiru-Ministru Interinu ne’e hatutan, Timor-Leste lakon tan nia erói ida ne’ebé hahú kedas prosesu resistensia to’o Timor-Leste hetan indepedensia kontinua nafatin nia dedikasaun no protesaun tomak ba prosesu konstrusaun nasaun.

Asanami kontinua husu ba povu Timor-Leste ne’ebé la to’o iha saudozu nia residensia hodi presta omenajem kontinua hasa’e orasaun ba saudozu iha idak-idak nia fatin. Sidadaun sira maske iha fiar ne’ebé la hanesan, maske iha ideia ne’ebé kontrariu, maske iha partidu ne’ebé la hanesan maibé sentidu solidariedade no mos sentimentu umanu.

“Ita bele partidu oi-oin, ita bele organizasaun oi-oin ita Timor ne’e ida deit, ita nia vizaun ita nia misaun maka ida deit, ita hakarak realiza heroi sira nia mehi, sira nia luta, vizaun sira nia oinsá maka Timor-Leste ida ne’ebé prospero dignu no hakmatek, tanba ne’e husu ba inan-aman sira,Joven sira iha ne’ebé deit halo orasaun reza nafatin ba ita nia saudozu atu nia klamar bele tulun nafatin ita hamtuk ho heroi sira seluk,” Assanami Sabino hateten.

Vise-Primeiru-Ministru haktuir, bainhira akompãna saudozu ba iha Aeroportu Internasionál Nicolao Lobato sei tatoli ba saudozu katak maun la mesak, maun lao ho eroi sira, maun lao akompaña ho grasa Maromak nian ho beiala sira ne’ebé maun sei rekupera hodi fila mai Timor-Leste hodi hamutuk ho estadu no povu ida ne’e maibe destinu lori tristeza  boot ba povu no nasaun ida ne’e.

Mariano Asanami Sabino mós kontinua husu ba juventude sira, liu-liu ba juventude FRETILIN maske saudozu lahamutuk ona ho sira maibé kontinua banati nafatin saudozu nia hahalok sira no mos sentidu Estadu katak labele kahur sasan partidu no sasan  estadu.

Saudozu Fransisco Guterres Lú-Olo nia serimonia funebre sei realiza iha Sábadu (27/06/2026) iha Jardim dos Herois Metinaro.

Iha observasaun ne’ebé Rafa.tl iha Saudozu nia residensia hatudu entidade hotu-hotu kontinua presta omenagem ho sentidu tristeza tuir oráriu ne’ebé maka parte Governu hamutuk ho familia no partidu FRETELIN fó sai ona.

Jornalista: Remigia Locatelli/Editór: Vito Salvadór