PD Sei Aprezenta Ba Primeiru-Ministru Figura Foun Ba Asume Pasta Ministru Ensinu Superiór Siénsia no Kultura

Prezidente Partidu Demokrátiku nu’udar mós Vise-Primeiru-Ministru no Ministru Koordenadór Asuntu Sosiais, Mariano Assanami Sabino.

Díli, 7 Setembru 2026 (RAFA) – Partidu Demokrátiku (PD) sei aprezenta lista figura foun ba kargu Ministru Ensinu Superior, Siénsia no Kultura (MESSK)  ba Primeiru-Ministru Kay Rala Xanana Gusmão iha tempu badak.

Prezidente PD nu’udar mós Vise-Primeiru-Ministru no Ministru Koordenadór Asuntu Sosiais, Mariano Assanami Sabino, Segunda-ne’e, konfirma katak  lista ne’ebé sira-nia parte atu aprezenta ba PM Xanana ne’e kompostu husi ema na’in-20, inklui reitór no eis-reitór universidade sira, nune’e mós ema intelektual sira ne’ebé iha esperiénsia relevante iha área ensinu superiór.

Mariano Assanami Sabino hateten nia sei lori lista ne’e aprezenta ba Primeiru-Ministru iha tempu badak atu halo prosesu selesaun tuir nesesidade governasaun.

“Figura ita iha, depende Primeiru-Ministru no Prezidente Repúblika atu eskolla. Fulan ida-ne’e, ita tenke aprezenta ona ba Primeiru-Ministru,” Mariano Assanami Sabino hateten hodi reponde jornalista sira   iha Centro de Convenções de Díli.

Nia subliña katak lideransa iha área ensinu superior la’ós de’it kona-bá hili ema ida atu kaer pozisaun. Maibé, importante liu mak hadi’a sistema, ambiente servisu no utiliza rekursu umanu iha ministériu.

Nia hatete mós katak prosesu selesaun sei konsidera figura sira ne’ebé iha esperiénsia no koñesimentu kona-bá programa governasaun, tanba governasaun nia mandatu besik remata no presiza garante kontinuidade programa sira.

“Figura barak loos mak sei selesiona. Ita hotu hatene katak PD nia kuadru sira mós barak mak kaer instituisaun independente sira, la’ós iha PD de’it. Entaun ita halo selesaun  di’ak, ita presiza ema ne’ebé familiar no koñese programa governasaun atu fó kontinuidade,” Mariano Assanami Sabino hateten.

Nia konsidera ensinu superior nu’udar área importante tebes tanba iha relasaun direta ho dezenvolvimentu ensinu superiór no preparasaun rekursu umanu Timor-Leste.

Prezidente PD ne’e hatete, ema ida ne’ebé merese atu lidera Ensinu Superior ne’e mak Ministru matebian José Honório ona, maibé tanba nia destinu mak PD buka fila-fali ema ne’ebé bele nesesariu atu kontinua programa governu, presiza garante misaun, vizaun no programa foun ba área ensinu superior.

Iha parte seluk, Vise Primeiru-Ministru Assanami hatete katak nia orienta ona atu halo enkontru ho reitór universidade sira hodi diskute kona-ba “Study Day” ba estudante sira, ho objetivu atu hadi’a koñesimentu no kapasidade estudante sira iha língua Inglés no Portugés.

Nia hatutan kapasidade iha língua rua ne’e importante tanba Timor-Leste agora sai membru ASEAN no kontinua nu’udar membru CPLP, nune’e estudante sira presiza familiar ho língua internasionál sira ne’e.

Nia mós ko’alia kona-ba kontinuidade aula dijitalizasaun, inklui oportunidade ba profesór ho grau doutor ne’ebé la iha Timor-Leste atu hanorin estudante sira liuhusi  online.

Jornalista: Cesarina de Carvalho