PCIC Detein Sidadaun Estranjeiru Na’in-16 Utiliza Banner Polísia Japaun Halo Atividade Scam Call Centre

PCIC detein suspeitu sira ba kazu scam call centre iha Sola Otél iha Becora, Díli, Sesta 02 Outubru 2026.

Díli, 02 Outubru 2026 (RAFA)- Polísia Sientífiku Investigasaun Kriminál (PCIC-sigla portugés) detein sidadaun estranjeiru na’in-16 ne’ebé utiliza banner Polísia Japãun hodi halo atividade scam call centre iha Sola Otél iha área Au-hun, Becora, Díli.

Iha Sesta rai-nakaras, hale’u tuku 03:00 Otl,   ekipa PCIC halo operasaun flagante delitu detéin sidadaun estranjeiru na’in-14 no nain rua seluk halai subar tiha maibé ikus PCIC kaptura hikas.

Sidadaun estrranjeitu sira ne’e, kompostu husi  na’in-hitu (7) ho  nasionalidade Japaun, na’in-haat Xina , Taiwan na’in-rua (2), Kamboja na’in-ida, no na’in-rua seluk kaptura ikus iha hela identifikasaun.

Iha operasaun ne’e, halo mós apreensaun  bá  objetu laptop ida (1), komputador rua (2),  telemovel,  aparellu Starlink, vintuiña,  no objetu seluk tan ne’ebé ekipa PCIC sei rekolla hodi sura.

Observasun RAFA iha lokál Sola Otél hatudu katak sidadaun estranjeiru sira utiliza kuartu ki’ik 10 ne’ebé instala telemovel iha laran hodi hala’o atividade atu hanesan scam call centre.

Iha kuartu ida seluk mak  sidadaun sira instala banner Polísia Japaun nian, komputadór ida, rádiu komunikasaun tolu, atributu farda, xapeu polísia Japaun nian.

Sola Otél  nia tipu infraestrutura andár rua, parte okos kuartu 11  no andár leten kuartu ualu (8), salaun boot ida mak sidadaun estranjeiru sira utiliza hodi kontrola ekipa instala komputadór rua, laptop rua, inklui printer ida.

PCIC mós halo aprensaun ba karreta ida, aparelu Starlink-ualu, telemovel seidauk sura, pasaporte seidauk sura, laptop, komputadór, inklui ekipamentu sira seluk ne’ebé sidadaun estranjeiru sira utiliza ba atividade deskonfia iha relasaun forte ho jogu ilisitu scam call centre.

Hafoin remata apreensaun autoridade seguransa kontinua transporta sidadaun estranjeiru na’in-16 hamutuk ho evidensia sira ba iha edifisiu PCIC, hodi kontinua ba investigasaun no detensaun.

Fó hanoin fali katak,  iha loron 19 fulan-Jullu tinan 2026, Polísia Nasionál Timor-Leste (PNTL) liu husi Diresaun Servisu Investigasaun Kriminál (DSIK), Forensik no Intelejensia sira tama uluk Sola Otél iha área Becora detein sidadaun estranjeiru na’in-rua kompostu husi Xinés na’in-ida no Jepan na’in-ida ne’ebé envolve atividade  Scam Call Centre.

Jornalista: Juvinal Cabral /João Carlos