Pasiente Dengue 166 Kontinua Baixa iha Ospitál Sira iha Timor-Leste

Ministra Saúde, Élia A.A. dos Reis Amaral. Imajen/Rafa.tl

DILI, RAFA.tl– Ministra Saúde (MS), Élia A.A. dos Reis Amaral, informa  dadus ne’ebé iha, husi fulan-Dezembru to’o ohin loron, Ministériu Saúde rejista pasiente ho moras dengue 2.000-resin no husi númeru ne’e pasiente ne’ebé mak hetan tratamentu no alta ona ba uma ho di’ak 1.917 no 166 sei kontinua baixa iha ospitál sira iha teritóriu nasionál.

Notísia Relevante: MS Rejista Kazu Dengue Hamutuk 1.700 no Na’in-Haat Lakon Vida

Ministra Saúde, Élia dos Reis Amaral ba jornalista sira iha Palásiu Governu, Kuarta (11/02/2026) hatete, parte Ministériu Saúde halo ona  medida preventiva sira antes, hodi kombate moras dengue ho maneira halo fomigasaun hamutuk 2000-resin iha teritóriu laran tomak  inklui distribui abate ba uma-kain  hamutuk  8000-resin.

“Agora esforsu hotu no medida hotu ita halo, ita mós halo ona fomigasaun, ita hotu akompaña,  fomigasaun ne’e hahú tiha ona husi fulan-Setembru no fulan-Outubru, tinan kotuk, maibé ita labele halo fomigasaun kada fulan, tanba  ita presiza halo intervalu,  atu nune’e, substánsia  kímiku ne’e  bele iha, ita dehan katak servisu ho di’ak, entaun ha’u hanoin medida ne’ebé mak ita halo mak fomigasaun ba teritóriu nasionál,  no mós distribuisaun ba abate,”  Ministra Élia dos Reis Amaral esplika.

Governante ne’e  informa, hahú husi fulan-Dezembru tinan 2025,  to’o fulan-Fevereiru ne’e, Ministériu Saúde rejista pasiente hamutuk 2000-resin ho  nia klasifikasaun husi leve moderadu, no mós grave, maibé ho servisu pesoál saúde sira nian, husi númeru pasiente ne’ebé baixa iha 1.917 mak alta ka fila ona ba uma.

Antes ne’e, Diretór servisu Apóiu Diagnóstika Terapéutika Ospitál Nasionál Guidu Valadares (HNGV), Vidal de Jesus Lopes hatete, iha fulan-Janeiru ne’e, HNGV rejista moras dengue hamutuk 535 no husi númeru ne’e pasiente na’in-hitu lakon vida no 111 sei kontinua halo tratamentu.

Reportajen ekipa Rafa.tl