Parké Nasionál TWNC-Sumatra Sai Referénsia Proteje Natureza no Balada Fuik iha Timor-Leste

Prezidente Repúblika José Ramos-Horta hamutuk ho Premiadu Nobel ba Paz no Premiu Turing sira halo vizita ba Tambling Wildlife Nature Conservation (TWNC) iha Sumatra, Indonézia, Kinta 27 Agostu 2026.

Sumatra,  29 Agostu  2026 (RAFA)- Hafoin vizita ba  Parké Nasionál  Tambling Wildlife Nature Conservation (TWNC) hamutuk ho Laureadu Nobel no sientista internasionál sira, Prezidente Repúblika José Ramos-Horta, hatete parke ne’e bele sai referénsia ba Timor-Leste no liu-liu timoroan sira  hodi proteje  natureza no balada fuik sira.

Vizita Prezidente Repúblika José Ramos-Horta ba Tambling Wildlife Nature Conservation (TWNC)  ba dala-rua ona. Antes ne’e, iha fulan-Marsu 2026 Prezidente Repúblika halo ona vizita dahuluk ba Tambling Wildlife Nature Conservation (TWNC), nia parte apresia no orgullu ho emprezáriu Tomy Winata ne’ebé liuhosi nia fundasaun Artha Graha Peduli (AGP)  bele jere Tambling Wildlife Nature Conservation liu tinan 30 no sai fatin konservasaun furak ba públiku.

“Sira ne’ebé mai tenke aprende oinsá atu moris iha reinu animál nian. Ida-ne’e maka esperiénsia furak ida. Ita bele haré katak ema lokál sira partisipa tomak. Ida-ne’e maka lisaun ida ba Indonézia, Malázia,  Filipina, no mundu tomak , no ita iha Timor-Leste mós iha esperiénsia ne’ebé hanesan. Maibé ha’u hakarak aprende liután kona-bá oinsá atu proteje ita-nia parké nasionál sira,” José Ramos-Horta haktuir ba jornalista sira.

Xefe Estadu husu komunidade  sira liuliu joven sira  atu labele kasa balada fuik sira arbiru  no sunu rai arbiru, maibé tenke proteje natureza no balada fuik sira no mós labele soe lixu arbiru.

Konservasaun Tambling Wildlife Nature Conservation (TWNC), lokaliza iha Illa Sumatra Indonézia, hahú nia operasaun ka halo konservasaun iha tinan 1996, ne’ebé jere  no finanseiru direita husi Fundasaun  Artha Graha Peduli (AGP).  Na’in husi fundasaun Artha Graha Peduli (AGP), mak emprezáriu susesu ida husi nasaun  Indonézia, Tomy Winata.

Antes halo konservasaun ba Tambling Wildlife Nature Conservation, fatin referé hetan estraga ilegál, tanba ne’e Fundasaun Artha Graha Peduli hahú programa konservasaun ne’e objetivu atu reabilita no proteje hametin seguransa floresta no fó protesaun ba fauna no natureza sira  inklui harimau Sumatra sira ne’ebé moris iha Illa referé.

Tinan 2007–2008 Tambling Wildlife Nature Conservation TWNC halo kooperasaun ho Governu Indonézia liuhosi akordu ho Ministériu Floresta   katak área TWNC tama iha  sistema konservasaun Parké Nasionál ka Taman Nasional Bukit Barisan Selatan (TNBBS).

2010 Parké Nasionál Tambling Wildlife Nature Conservation (TWNC), ofisialmente inagura no hetan rekoñesimentu husi Ministru Floresta Repúblika Indonézia  Zulkifli Hasan SE.MM.

Tambling Wildlife Nature Conservation (TWNC), iha floresta  hamutuk 48,153 ektare, área kostál 14,089 ektare.

Jornalista : Zita Menezes/Elio dos Santos