Parabeniza Povu Ba Loron Konsulta Popular, Assanami Rekoñese Dezenvolvimentu Sei La’o Neineik

Díli, 27 Agostu 2026 (RAFA)- Vise-Primeiru-Ministru no Ministru Koordenadór ba Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, parabeniza povu Timor-Leste ba selebrasaun loron Konsulta Populár  ba dala-27 (30 Agostu 1999-2026), no  rekoñese dezenvolvimentu sei la’o neineik tuir objetivu no planu estratéjiku.

“Parabens povu tomak, tanba ita selebra 30 Agostu ba tinan-27 ita nia ukun aan. Ita hatene ita nia prosesu dezenvolvimentu lubuk ida sei la’o nei-neik, la’o tuir objetivu ita nian no ita nia alvu ne’ebé ita tau iha planu estratéjiku,” hateten Vise-Primeiru-Ministru Mariano Assanami Sabino.

Assanami hatutan dezenvolvimentu sosiál ba dignidade umana, respeitu malu, liberdade ba média, demokrásia lao lais no di’ak, tanba ne’e hotu-hotu ho tinan 27 konsulta Populár mantein nafatin disiplina esforsu hakas aan unidade nafatin. Maske, partidu oi-oin, oorganizasaun oi-oin maibé nafatin Timor-oan ida de’it ba serbí Timor ida de’it ba ita tomak, atu la’o nafatin ba oin. Nune’e, joven, estudante, inan-aman sira uluk kaer kilat mak luta, ohin imi kaer lapizeira aprende matenek, atu nafatin luta ba oin.

“Ba joven sira ne’ebé servisu iha rai li’ur apresia ba imi, agradese no respeitu tomak ba imi, imi iha servisu saida de’it, mais imi iha dignidade, Ita nia dignidade sosa ho 300 mill pesoas nia mate mak ita hetan servisu kiik ka boot, maibé ita nafatin iha imi nia kontribuisaun nafatin importante ba Timor-Leste. Imi nia dedikasaun ne’ebé imi halo ne’e importante nafatin ba ekonómia Timor Timor-Leste,” Assanami subliña.

Tuir ajenda ofisiál husi Governu liu husi Ministeriu Administrasaun Estata (MAE), komemorasaun loron 30 Agustus ba dala-27 tinan ne’e sei realiza iha Munisípiu Manatuto.

Jornalista: Cristina Ximenes