Papa Leão husu MISSIO Kontinua Asaun Missionária iha Ida-idak Nia Sirkunstánsia Eklesiástika iha Mundu

Sua Santidade Papa Leão XIV iha okaziaun Assembleia Jerál Anual MISSIO nian. Imajen/Arkidioseze Díli

Díli, 03 Juñu 2026 (RAFA.TL)- Diretór MISSIO Timor-Leste Pe. Bento Barros Pereira, hamutuk ho Diretór Nasionál MISSIO husi nasaun atus-ida-resin, iklui Timor-Leste hasoru malu ho Sua Santidade Papa Leão XIV iha okaziaun Assembleia Jerál Anual MISSIO nian.

Santu padre husu MISSIO  hotu kontinua asaun missionária iha ida-idak ninia sirkunstánsia eklesiátika iha mundu tomak

Iha komunikadu ne’ebé Rafa.tl asesa husi Pájina Arkedioseze Metropolitana Díli, Kuarta (03/06/2026), revela katak iha loron dahuluk fulan-Juñu nian, ne’ebé sai nu’udar loron dalima ba Assembleia Jerál Annual Pontifícias Obras Missionárias (MISSIO) nian diretores nasionál husi nasaun hamutuk atus-ida-resin iha mundu hamutuk ho Pro-Prefeito ba Evangelização nian Eminência Luis António Gokim Cardeal Tagle no funsionáriu sira tomak iha Dikastériu Evangelizasaun nian hasoru malu ho Sua Santidade Papa Leão XIV iha Vatikauo.

Audiénsia ho Santu Padre ne’e nu’udar programa ida ne’ebé kada tinan realiza hodi rona lia-fuan murak Amu Papa nian kona-bá asaun missionária iha mundu tomak ne’bé dirije husi Kardeál Tagle no iha kada nasaun koordena husi diretór nasionál MISSIO rai refere nian.

“Partisipa mós iha audiénsia ne’e Pe. Bento Barros Pereira, Diretór Nasionál MISSIO Timor-Leste nian.” Rafa.tl sita komunikadu.

Santu Padre iha nia mensajen hahú ho ninia agradesimentu ba hotu-hotu ne’ebé prezente iha audiénsia ne’e no ba sira ninia kolaboradór sira no ema hotu ne’ebé hala’o ona knar hodi promove asaun missionária iha ida-idak ninia sirkumstánsia eklesiátikas iha mundu tomak iha nafatin komuñaun ho igreja inan.

Santu Padre fó hanoin fila-fali mós tinan 100 MISSIO ninia ezisténsia ne’e importante tebes. Hodi refelete MISSIO ninia esistéscia ne’e Amu Papa Leão XIV fó hanoin fali katak ohin loron iha mundu ne’ebé mosu funu, fahe malu no konflitu entre rai-rai no entre ema sira.

Iha Obras haat MISSIO nian; Pontifícias Obras Propagação da Fé (POPF); Obras Pontifícias Infância e Adolecentes Missionária (OPIAM); Pontifícias Obras São Pedro Apóstolo (POSPA) no Pontifícias União Missionária (PUM), ida-idak buka atu liu husi nia asaun missionária halao di’ak liután igreja nia misaun atu haklaken Jesus Kristu Prínsipe paz nian be iha ninia inkarnasaun hatudu Maromak Nia domin boot ne’e ba ema hotu-hotu.

Santu Padre realsa tan katak tuir tema selebrasaun loron mundiál das missões ka domingu das missões tinan 2026 nian ne’ebé sei selebra MISSIO ninia tinan 100 ho tema “IDA DEIT IHA CRISTO UNIDOS IHA MISSÃO”, buka tulun atu sarani sira tomak bele moris iha unidade ho ita Nai Jesus Kristu sai kle’an liután no hamutuk totalmente iha misaun domin rohan-laek Maromak Nian.

Molok taka mensajen Santu Padre Leão XIV haraik ninia bensaun apostólika ba dirijente sira Dicastério Evangelização nian no diretór nasionál sira hotu ho sira ninia kolaboradór sira hotu iha ida-idak ninia fatin no dioseze sira ne’ebé halao servisu vital asaun missionária nian.

Santu Padre tau mós hotu-hotu iha mahan Inan Virjen Maria Maromak Nia Inan, Liurai feto misaun nian ho Santu Missionáriu sira nia harohan daet.

Jornalista: Remigia Locatelli/Editór: Vito Salvadór