PAM Díli Prepara Esbosu Lei Foun Regula Negosiante Ambulante

PAM Díli, Francisco dos Santos.

Díli, 03 Agostu 2026 (RAFA. TL)- Prezidente Autoridade Munisípiu (PAM) Díli,  iha ona planu no elabora  hela esbosu lei  ka regulamentu foun  atu submete ba ministériu kompetente hodi  regula atividade negosiante ambulante sira nian iha sidade Díli.

Intensaun hosi regulamentu foun ne’e  hodi mantein ordem no la prejudika utilizasaun espasu públiku hodi hamosu engrafamentu no asidente sira ne’ebé la espera.

Prezidente Autoridade Munisípiu Díli, Francisco dos Santos hateten, Autoridade Munisípiu komprome  buka solusaun ne’ebé benefísia parte hotu-hotu, liuliu vendedór ki’ik sira ne’ebé depende ba atividade fa’an atu sustenta ekonomia família.

“Ami prepara hela esbosu lei ida ne’ebé sei haruka ba ministériu kompetente atu publika iha Jornal da República. Bainhira lei ne’e tama iha vigór, ami sei identifika espasu públiku balun ne’ebé apropriadu ba vendedór ambulante sira atu fa’an. Maibé, sira tenke tuir regra, selu taxa tuir regulamentu no la bele soe foer arbiru,” PAM Díli, Francisco dos Santos informa, Segunda-ne’e.

Francisco dos Santos hatutan katak bainhira regulamentu ne’e implementa ona, Autoridade Munisípiu Díli sei servisu hamutuk ho Ministériu Komérsiu no Indústria no entidade relevante sira atu identifika no prepara área espesiál ba vendedór ambulante, inklui fatin ba kulinária no merkadu organizadu.

PAM Díli mós apela ba vendedór ambulante sira atu kolabora ho Governu, respeita regra kona-bá utilizasaun espasu públiku, no partisipa ativamente iha prosesu organizasaun ne’ebé sei implementa.

iha observasaun RAFA.TL hatudu katak to’o agora vendedór ambulante balun sei kontinua okupa espasu públiku iha área Audian, Kampung Baru, Bairru-pité, Aimutin, no Fatuhada,  hodi halo sira nia atividade negósiu.

Jornalista: João Carlos