PAM Díli Hein Aseitasaun husi MF Ba Implementasaun Estasionamentu iha Bairru sira Díli Laran

Prezidente Autoridade Munisípiu Díli, Francisco dos Santos.

Díli, 19 Setembru 2026 (RAFA) – Prezidenti Autoridade Munisípiu Díli (PAM), Francisco dos Santos, haruka ona proposta ba Ministériu Finansas (MF) kona-bá planu estasionamentu iha bairru sira iha Munisípiu Díli ho objetivu atu organiza parkeamentu veíkulu no prevene parkeamentu arbiru ne’ebé bele hamosu asidente tráfiku no difikulta asesu ba veíkulu emerjénsia.

“Agora tama ona iha prosesu identifikasaun tanba bairru sira-ne’e espasu kuaze laiha ona. Maibé, ita nafatin buka meius. Se iha rai privadu, ita buka dalan atu hola no uza, ezemplu Hanesan iha Surikmas, espasu kuaze laiha. Ita haree katak karreta seluk susar tebes atu asesu. Ita nia objetivu mak oinsá atu garante katak maluk sira ne’ebé moras no presiza ambulánsia bele asesu. Se iha ahi iha uma ruma no kareta sira parkeia iha ne’ebá, bele prejudika ambulánsia no bombeirus sira atu tama,” PAM Díli Francisco dos Santo ba jornalista sira iha, Díli,  Sábadu-ne’e.

Francisco hatutan proposta kona-bá estasionamentu ne’e agora hein prosesu koordenasaun no aprovasaun husi Ministériu Finansas, tanba implementasaun sistema estasionamentu presiza apoiu no desizaun husi instituisaun relevante.

PAM Díli konsidera problema estasionamentu sai dezafiu ida iha área urbana, liuliu iha bairru sira ne’ebé movimentu veíkulu no ema lao-ain aas. Veíkulu ne’ebé parkeia iha estrada, liña dalan ka fatin públiku bele hamenus espasu ba sirkulasaun no aumenta risku ba asidente tráfiku.

Nia sublinha estasionamentu iha bairru sira tenke konsidera mós nesesidade komunidade, atividade komérsiu no utilizadór estrada sira, liuliu atu garante katak fatin estasionamentu la taka dalan públiku no la impede asesu ba veíkulu emerjénsia.

PAM Díli hatutan mós katak sei hametin fiskalizasaun ba veíkulu sira ne’ebé parkeia iha fatin proibidu, liuliu iha área komérsiu, estrada prinsipál no fatin sira ne’ebé movimentu ema no veíkulu sira.

Francisco dos Santos subliña bainhira proposta ne’e hetan aprovasaun no implementasaun, sistema estasionamentu bele sai parte husi medida atu organiza tráfiku iha Díli, aumenta disiplinamentu kondutor no promove utilizasaun espasu públiku ho ordenadu.

Jornalista: João Carlos / Juvinal Cabral