Opozisaun Kestiona Rekrutamentu Juíz Supremu Tribunál Justisa Nakonu ho Konflitu Interese

Membru Bankada FRETILIN, Florentino Ximenes Sinarai.

Díli, 28 Setembru 2026 (RAFA)- Bankada Opozisaun FRETILIN, liu husi Deklarasaun Politiká iha reuniaun Plenária Parlamentu Nasionál, Segunda-ne’e, kestiona maka’as rekrutamentu Juíz Supremu Tribunál Justisa tanba nakonu ho konflitu interese.

Membru Bankada FRETILIN, Florentino Ximenes Sinarai, hatete, membru Konsellu sira mós iha direitu atu tuir konkursu ba juíz Tribunal Supremu Justisa nian,  maibe sira tenke rejigna an hosi Konsellu antes sira hatama sira nia aplikasaun formal, atu evita ema ida nomeia nia an rasik.

“Daudauk ne’e, Sr. Afonso Carmona hanesan Presidente Tribunál Rekursu no Presidente Konsellu Superiór Majistratura Judisiál nian mós aplika ba kargu juiz Tribunal Supremu. Maske nu’udár aplikante ida, nia kontinua asume kargu iha Konsellu Superiór Majistratura Judisiál nian,” Florentino Ximenes Sinarai duvida.

Bankada FRETILIN  mós preokupa ho figura ka kandidatu seluk ba juíz Tribunál Supremu hanesan Francisco Ly Nicolau, ne’ebé antes semana kotuk ne’e sei asumi kargu nu’udár Vise Presidente Konsellu Superiór Majistratura Judisiál.  Nune’e, oinsá mak Konsellu Superiór Majistratura Judisiál bele garante transparánsia no sees husi konflitu ba interese bainhira  nia membru ida mós hola parte iha kandidatura nu’udár Juíz Tribunál Supremu Justisa nian.

Bankada FRETILIN preokupa ho Francisco Ly Nicolau nia kandidatura tanba nia iha defisiénsia iha integridade nu’udár jurista ida.

Bankada FRETILIN haree katak  Francisco Ly Nicolau deskonfia iha ligasaun ho Chief Executive Officer ba Core Management Corporation (CMC), Dr. Ken Lim aka Lim Zhao Qi, ne’ebe tuir  relatóriu ONU nian iha tinan kotuk deskreve sai nu’udár ema ka membru ida hosi rede krime organizadu ne’ebé halo operasaun iha Timor-Leste.

Bankada FRETILIN  husu ba Komisaun ba rekrutamentu Juizés Tribunál Supremu Justisa nian atu halo peskiza ida ne’ebe kle’an ba kandidatu sira, nia nivel akademiku, koñesimentu no esperiensia servisu legál no valiasaun ba sira nia konduta ba etiká no profesionalismu nian, nomós halo avaliasaun ba sira nia rejistu kriminál no konflitu ba interese nian.

Prosesu Rekrutamentu Tenke Transparánsia

Bankada FRETILIN mós husu rekutramentu juíz ba Supremu Tribunál Justisa  (STJ) tenke transparánsia no sees husi konflitu interese.

“FRETILIN, sekunda no apresia teb-tebes ba preokupasaun sira publiku no Sosiedade sivil sira katak estadu tenke garante prosesu ba konkursu hodi rekruta juizes Tribunal Supremu Justisa nian ne’e, tenke la’o tuir lei hateten, iha transparensia no sees hosi konflitu ba interese nian hodi nune’e Timor-Leste bele hetan juizes Tribunál Supremu Justisa ne’ebe iha integridade no iha lejitimidade juridiká,” hatete Deputadu Florentino Ximenes Sinarai.

Deputadu Sinarai esplika, konstituisaun  RDTL hateten katak Juizes Tribunál Supremu Justisa nian sei hetan hili hosi Konsellu Superiór Majistratura Judisiál, no Juiz ida de’it mak sei hili hosi Parlamentu Nasional.

Tanba ne’e Bankada FRETILIN  fó hanoin katak presiza iha mekanismu ida ne’ebé transparante no justu atu asegura katak ema sira ne’ebé  iha Konsellu Superiór Majistratura Judisiál nian, sei halo desizaun sira ne’ebé livre hosi konflitu ba interese poliikú nian.

Jornalista : Zita Menezes