Ouvir RAFA Ritmo, Voz e Coração de Timor
Díli, 13 Outubru 2026 (RAFA)– Membru Bankada Opozisaun husi Partidu FRETILIN no KHUNTO husu ba Governu atu asegura sidadaun sira husi poluisaun anin tanba fó impaktu ba saúde públika sidadaun sira nian.
Membru Parlamentu Nasionál husi Bankada FRETILIN, Nurima Ribeiro Alkatiri ba jornalista sira iha Parlamentu Nasionál, Tersa-ne’e, preokupa ho situasaun poluisaun anin ne’ebé mai husi nasaun viziñu Indonézia, tanba la’ós afeta iha Timor-Leste de’it, maibé afeta ba rejiaun sira iha sudeste aziátiku nian.
Deputada ne’e hatete relasiona situasaun ne’e importante loos ba sidadaun hotu-hotu liuliu hanesan labarik-kiik, ferik-katuas sira no ema vulneravél atu kuidadu aan bainhira halo atividade iha liur presiza uza maskára ka oklu hodi hadook riskú afeta ba saúde.
“Espera katak estadu mós haré hela situasaun ida-ne’e husi parte rua oinsá atu ajuda jere situasaun ida-ne’e ba populasaun, liuliu tanba ida-ne’e sei afeita liubá sira ne’ebé hala’o atividade iha li’ur no mós tenke haré ba poluisaun ne’ebé ita iha ita husu atu selu multa mai ita tanba afeta ita nian rai,” Deputada FRETILIN, Nurima Ribeiro Alkatiri hateten
Sorin seluk, Xefe Bankada KHUNTO Deputadu António Verdial de Sousa kritika Governu hanesan Ministériu Saúde to’o agora la fó informasaun ruma kona-bá impaktu husi poluisaun anin ba ema nia saúde no oinsá populasaun bele prevene aan husi poluisaun anin ne’ebé afeta mai sidade Díli.
“Iha loron hirak ne’e terus tebes hasoru situasaun ida ne’ebé ladún di’ak ba saúde, liuliu ba joven, labarik, inan-ferik no katuas sira no ita hotu hasoru situasaun ida ne’ebé ladún di’ak ba ita nia saúde rasik,” hatete Deputadu António Verdial de Sousa.
Reprezentante povu ne´e husu Ministériu Negosiu Estranjeiru no Koopersaun presiza halo komunikasaun ho Governu Indonézia hodi hamutuk buka solusaun ba situasaun poluisaun anin husi nasaun Indonézia ne’ebé afeta mai Timor-Leste.
Jornalista : Zita Menezes
Written by: RafaFM
Opozisaun Husu Governu Asegura Sidadaun sira husi Poluisaun Anin Tanba Impaktu Ba Saúde Públika
todayNovember 20, 2026 13 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt