Ouvir RAFA Ritmo, Voz e Coração de Timor
Díli, 19 Outubru 2026 (RAFA) – Ministériu Edukasaun (ME) sei kontinua prioritiza pagamentu saláriu no subsídiu profesór sira, konstrusaun edifísiu eskola, no hadi’a kualidade edukasaun iha alokasaun Orsamentu Jerál Estadu (OJE) ba tinan 2027.
Ministra Edukasaun, Dulce de Jesus Soares, hatete orsamentu ba tinan 2027 hamutuk US$500 mil resin, ne’ebé sei aloka ba programa edukasaun sira atu garante atividade esensiál iha setór edukasaun kontinua la’o, inklui pagamentu saláriu profesór, subsídiu no funsionamentu eskola CAFE.
“Orsamentu ba 2027 Ministériu Edukasaun hakarak garante katak atividade esensial sira kontinua la’o, pagamentu saláriu ba profesór, pagamentu ba subsídiu sira, nune’e mós funsionamentu eskola CAFE ho destakamentu profesór 150 kada tinan depois subsídiu eskolar sira, atividade diária ne’e garante tenke la’o nafatin,” afirma Ministra Dulce de Jesus, hafoin hala’o audénsia públika ho Komisaun G iha Parlamentu Nasionál, Segunda-ne’e.
Nia esplika katak orsamentu ba tinan 2027 sei aloka ba programa lima, ne’ebé inklui edukasaun pré-eskolar, ensinu báziku, ensinu tékniku vokasionál, edukasaun inkluziva no ensinu rekorrente, ho atividade hamutuk 89 no sub-programa 31.
Aleinde ne’e, ME sei kontinua implementa projetu konstrusaun eskola sira ne’ebé hela iha prosesu konstrusaun, ne’ebé hamutuk besik 175 eskola, ho alokasaun orsamentu besik US$6 millaun atu kontinua no kompleta konstrusaun sira.
Ministériu Edukasaun mós sei halo revizaun ba kuríkulu ensinu sekundáriu tékniku vokasionál, hametin utilizasaun teknolojia iha eskola sira, inklui instalasaun router internet iha eskola besik 300, no hasa’e kompeténsia profesór sira atu hadi’a orientasaun no dezenpeñu iha prosesu aprendizajen.
Iha audénsia públika ne’e, Komisaun G rekomenda ba ME atu kontinua halo kolokasaun profesór ba eskola sira ne’ebé sei menus kuadru dosente, no kontinua rekruta profesór foun atu responde ba nesesidade.
Rekomendasaun ne’e konsidera mós katak iha tinan 2027 profesór 300 ne’ebé tama reforma, nune’e ME presiza prepara kuadru pesoál no organiza fali kolokasaun profesór sira. Aleinde ne’e, ME planeia konstrui rezidénsia profesór hamutuk 100 iha tinan oin.
Ezekusaun orsamentu tinan 2026, ME ezekuta ona 72% husi orsamentu totál US$117.550.930.
Orsamentu ME ba tinan 2026 ne’ebé previstu iha OJE kompostu husi saláriu no vensimentu US$93.624.245, bens no servisu US$10.021.005, transferénsia públika US$4.852.080, kapitál menór US$2.000.000 no kapitál dezenvolvimentu US$7.053.600.
Orsamentu ne’e aloka ba programa prioridade sira, inklui funsionamentu no dezenvolvimentu institusionál, edukasaun pré-eskolar, ensinu báziku, ensinu sekundáriu jerál no tékniku vokasionál, no ensinu rekorrente, ho sub-programa hamutuk 39.
Ministra Edukasaun garante katak ME sei kontinua esforsu atu ezekuta orsamentu tinan 2026 to’o 100% ho di’ak, tuir planu no nesesidade setór edukasaun.
Jornalista: Cesarina de Carvalho
Written by: RafaFM
ME Prioritiza Saláriu Profesór no Mellora Kualidade Edukasaun OJE 2027
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt