Novembru, Hahú Liga Voleiból Primeira Divizaun Époka 2026

Sekretaria Ezekutiva Liga Voleiból Timor-Leste, Ustinia Guterres.

Díli, 26 Agostu 2026 (RAFA)- Orgaun Liga Voleibol Timor-Leste konfima Liga Voleiból ba primeira divizaun époka 2026 se’i realiza iha fulan-Novembru, tinan ne’e, no sei kompete husi klubu hamutuk 16.

Sekretaria Ezekutiva Liga Voleiból Timor-Leste, Ustinia Guterres, ba RAFA iha Jinaziu Desportu Díli (GDD), Kuarta-ne’e, informa Liga Voleibol Timor-Leste ne’ebé tutela iha Federasaun Voleibol Timor-Leste (FVTL), hetan apoiu fundu ho montante US$350,000.00, husi Ministériu Juventude, Desportu, Arte no Kultura (MJDAK) ne’ebé destina ba Liga Voleiból Timor-Leste, inklui kompetisaun MJDAK Cup hahú husi 3.º Divizaun, 2.º Divizaun to’o Primeira Divizaun.

“Ami iha sekertariadu Liga Voleiból Timor-Leste iha Federasaun Voleiból nia okos servisu hamutuk ho Ministeriu Joventude Desportu Arte no Kultura ba Liga nian husi Terseru divizaun MJDAK Cup iha munisípiu, segundu divizaun no primeira divizaun iha terseru divizaun ne’ebé kompete husi munisípiu hotu. Sira ne’ebé mak hetan primeru lugar Segundu lugar no terseru lugar se’i hetan tiket ba kompete iha primeru divizaun ne’ebé hamutuk ekipa 16 mak se’i kompete iha Liga Voleibol Timor-Leste primeira divizaun ne’ebé mak ita planea ona atu realiza iha fulan-Novembru mai” hatete Ustinia Guterres.

Sekretariu Ezekutivu ne´e hatutan, apoiu husi Governu, liuliu MJDAK ne´e importante, atu garante kontinuidade kompetisaun no fó oportunidade ba atleta no klube sira hodi dezenvolve kapasidade, esperiénsia no kualidade voleiból Timor-Leste, husi nível baze to’o nivel nasionál no kontribui ba selesaun nasionál iha kompetisaun sira rejionál no mos internasionál.

Jornalista: Davilio Valdamir