Noura AI Kaabi Konsidera Timor-Leste Hanesan Belun no Familia Lolos Ba Emirados Árabes Unidos

PR José Ramos-Horta ho Ministra Estadu iha Ministériu Negósiu Estranjeiru Emirados Árabes Unidos (EAU), Noura AI Kaabi, halo vizita no kuda ai-oan iha Dormitóriu Femenina, Segunda 31 Agostu 2026.

Díli, 31 Agostu 2026 (RAFA)- Ministra Estadu iha Ministériu Negósiu Estranjeiru Emirados Árabes Unidos (EAU), Noura AI Kaabi, konsidera Timor-Leste hanesan belun no Familia lolos ba Emirados Árabes Unidos, no país rua iha komprimisu atu hametin relasaun bilateral no lori ba futuru kooperasaun estratejiku sira ne´ebé sei lori benefisu mutua no liu-liu ba foin-sa´e timoroan sira.

Ministra Estadu iha Ministériu Negósiu Estranjeiru Emirados Árabes Unidos(EAU), Noura AI Kaabi hatoo deklarasaun ne´e iha nia vizita ofisiál dahuluk mai Timor-Leste, Segunda-ne´e, hafoin hasoru malu ho Prezidente Republika José Ramos-Horta, iha Palásiu Prezidensiál.

Ministra Noura AI Kaabi agradese ba Prezidente Repúblika, José Ramos Horta nia benvindu ne’ebé kmanek durante vizita dahuluk mai Timor-Leste no hato’o mós saudasaun kmanek husi Vise-Prezidente no Primeiru-Ministru Sheikh Mohammed bin Rashid Al Maktoum ba Xefe Estadu Timor-Leste no Povu Timoroan hotu.

“Timor-Leste nu’udar belun loloos ba Emiradus Árabes Unidus, liuhusi Prezidente Ramos-Horta nia solidariedade ne’ebé boot liu hafoin atake sira foin lalais ne’e hasoru ami-nia nasaun. Sorumutu ida-ne’e loke dalan foun sira hodi habelar liutan ita-nia kooperasaun sira iha setor oi-oin ne’ebe benefisia ba nasaun rua inklui enerjia renovável, parseria ekonómika, kapasitasaun, no apoiu tékniku ba Timor-Leste nia prezidénsia ba ASEAN iha tinan2029. Timor-Leste la’ós de’it parseiru ida, maibé hanesan família, no ami iha kompromisu atu avansa relasaun ida-ne’e ho sinseridade no laran-di’ak ne’ebé Timor-Leste hatudu ona mai ami,”  Noura AI Kaabi hateten.

Prezidente Repúblika José Ramos-Horta iha nia entrevista hatete, vizita ne’e realiza hafoin asinatura Memorandu Entendimentu iha fulan Maiu 2026 ba “Projetu rezidensiá no Fasilidade Sosiál ba Estudante Feto sira”, inisiativa ida ne’ebé hetan apoiu husi Emiradus Árabes Unidus hodi harii kompleksu rezidensiál modernu ida ba maizumenus estudante universitáriu feto hamutuk na’in 300 iha Díli. Projetu ne’e dezeña hodi fornese akomodasaun ne’ebé seguru no dignu ho enerjia solar 100%, armazenamentu udan-been no resiklajen bee-fo’er.

Xefe Estadu esplika, Governu EAU mós hakarak loke Embaixada iha ne’e, istóriku loos ba Timor-Leste, importante loos, primeiru país Árabe riku mak loke Embaixada iha ne’e. Entaun edifisiu ne’e ba feto oan sira nian, ne’e oin ses ba estrada foun, Embaxada oin ses ba estrada prinsipál.

“Sira prontu mós iha fatin ida ne’e atu simu estudante Timorense ne’ebé estuda área konstrusaun, atu halo hanesan estajiu atu servisu hamutuk ho kompañia hanesan halo baibain universidade sira halo traning instership ne’e halo parte sira nia kursu, bele mós dada sira ne’ebé estuda konstrusaun enjenaria bele mai apoiu haree no aprende. Traballadór kuaze maiória barak liu mak Timorense, kompañia Timor bara-barak iha ema ne’ebé esperiensia bele mai servisu iha ne’e,” Prezidente Repúblika José Ramos-Horta esplika.

Ramos-horta haktuir, desde Primeiru Governu konstituisionál hanesan  Ministru Negósiu Estranjeiru no Kooperasaun (MNEK) nia halo ona vizita ba EAU. Depois tinan hira nia laran primeiru bainhira halo expo ne’e EAU fó apoia fatin ba Toimor-Leste, fatin ba elementu sira atu hela, sira fó apoia ba Embaxada loke iha ne’eba, sira apoia finanseiramente no Relasaun diplomatika la’o di’ak loos, sira kontente Timor-Leste sira konsidera hanesan belun.

Hafoin enkontru, Prezidente Repúblika, José Ramos-Horta ho Ministra Estadu iha Ministériu Negósiu Estranjeiru Emirados Árabes Unidos (EAU), Noura AI Kaabi kontinua ba vizita fatin konstrusaun Komplexu Rezidénsia Estudante Feto nian ba aprezentasaun projetu no serimónia kuda ai-horis simbóliku.

Projetu ne’e hetan apoiu hosi Sua Alteza Sheikh Mohamed bin Zayed Al Nahyan, Prezidente Emiradus Arabes Unidus nian durante vizita ofisiál Prezidente Ramos-Horta nian ba EAU iha tinan 2023. Komplexu ne’e sei fornese akomodasaun seguru no modernu ba estudante universitáriu feto sira to’o 300.

Timor-Leste no Emiradus Árabes Unidus estabelese relasaun diplomátika iha 13 Novembru 2009. Asinatura Memorandu Entendimentu foin lalais ne’e ba Projetu Rezidénsia Estudante Feto nian iha Maiu 2026 hametin liután relasaun bilaterál sira.

Vizita nivel aas husi Ministra Estadu iha Ministériu Negósiu Estranjeiru Emiradus Árabes Unidus Noura Al Kaabi, no ninia delegasaun ba Timor-Leste sei konklui iha loron Tersa-feira, 01 Setembru 2026.

Jornalista: Cristina Ximenes