Nine Indústria Produz Roupa Desportiva Kualidade ho Presu Amigável

Roupa desportiva ne'ebé produs husi Nine Indústria ho kualidade no presu amigável. Imajen/Rafa.tl

DILI, RAFA.tl– Grupu empreza Esperansa Timor Oan (ETO) liuhosi nia empreza subsidiáriu Nine Indústria hanesan empreza produtór ba roupa desportiva ne’ebé kualidade ho presu amigável.

Notísia Relevante: Prezidente Komisaun Ezekutivu BNCTL Vizita Grupu ETO Nia Empreza Subsidiáriu Sira iha Liquiça ho Ermera

Kliente Nine Indústria, Bendito Mendes ba Rafa.tl iha ámbitu feira nasionál iha Tasi-Tolu, Sábadu (29/11/2025), hato’o  apresiasaun kle’an ba empreza ETO ne’ebé hola inisiativa investe iha industria produs roupa desportiva ho kualidade no presu amigável.

Nia hatutan, objetivu vizita pavillaun ETO Group ne’e tanba kuriozu ho Timor oan sira ne’ebé halo produsaun roupa desportiva iha Timor-Leste ne’ebé fó motivasaun di’ak tebes ba nia tuir nia background servisu nian.

“Ha’u mai vizita fatin ne’e foin hatene katak, Timoroan barak mak iha kreatividade, tanba halo rasik ona produsaun iha Timor-Leste, ne’e hanesan motivasaun ida mai ha’u, tanba iha ha’u nia background ne’e, iha duni kona-bá printing, ne’ebé ha’u nia área halai hotu ba ne’ebá, ne’ebé di’ak liu dezenvolve ita nia área ne’e ba oin, duke fiar liubá rai-liur, tanba ne’e Nine Industria ne’e di’ak, atu hamenus tiha buat sira ne’ebé mak ba mai husi rai-liur,” Bendito Freitas  hateten.

Nia haktuir, Nine Industria presiza halo konsolidasaun no sosializaun ba merkadu, hodi nune’e evita timoroan ba produz roupa desportiva (Jersey) iha estranjeiru.

Nia apresia no kontente tanba bele hetan timoroan sira ne’ebé maka iha matenek rasik, halo produsaun rasik no iha  fábrika rasik, ida-ne’e hanesan motivasaun ida ba  timoroan hotu atu  labele depende liubá produtu importasaun sira.

“Ha’u apresia no kontente, tanba ha’u hetan timoroan mós bele halo produsaun rasik no fábrika rasik, ha’u nu’udár joven ida, ha’u orgullu tebes no hanesan motiva ami hodi nune’e ami ida iha área imprime bele halo ligasaun ne’ebé di’ak no bele iha link hotu ba imi oinsá la’o ba oin,” nia hateten.

Bendito Mendes observa katak, Nine nia produtu ne’e kualidade tuir produtu saida maka sira hetan iha Indonézia, tanba Nine nia produsaun produz tuir klase ne’ebé kliente sira rekomenda, no dala-ruma mós bele di’ak liután, tanba iha rai-liur balun la tuir kliente nia hakarak, maibé iha ne’e, karik  kliente hakarak ida ne’e, nia sempre halo tuir ida ne’e, ne’ebé ida ne’e ba oin rezultadu sei di’ak tebes.

Nia mós  rekomenda ba timoroan labele ta’uk atu halo buat ida ne’ebé la kontra lei, tanba timoroan ida fó servisu ba nia maluk Timor, ne’e motivasaun di’ak, apresiasaun di’ak. Timor tenke evita uja produsaun importasaun, tanba Timor-Leste mos iha ona fábrika rasik.

Ikus liu nia mós husu ba empreza Nine Indústria prepara marketing Ida ne’ebé di’ak hodi nune’e ba futuru Timor-Leste mós presiza utiliza nia produtu rasik.

Reportajen ekipa Rafa.tl