MTK Sei Halo Lansamentu Komersiál Ba Fibra Óptika

Ministru Transporte no Komunikasaun (MTK), Miguel Marques Gonçalves Manetelu.

Díli, 01 Jullu 2026 (RAFA.TL)- Ministru Transporte no Komunikasaun (MTK), Miguel Marques Gonçalves  Manetelu, informa tempu badak MTK sei halo lansamentu komersiál  ba Kabu Submarinu Fibra Óptika hodi fornese internet ho kualidade.

“Komisaun instaladora Kabu Timor-Leste, Empreza Públika (CTL,E.P, sigla portugés) ho MTK mai  aprezenta ba Konsellu-Ministru kona-bá prosesu instalasaun Kabu  Sub-Marinu Fibra Óptika, prosesu ne’e kuazé konklui no preparasaun iha Bebonuk mós kuazé konklui, tanba ne’e mak ohin konklui iha aprezentasaun nia rohan,  husu Primeiru-Ministru nia tempu para ami fó tempu ida entre loron 20 to’o loron 30 fulan-Jullu ne’e,  primeiru-ministru nia tempu livre iha ne’ebé para ita atu ba halo lansamentu,” Ministru Miguel Marques Gonçalves  Manetelu informa ba jornalista sira iha Palásiu Governu hafoin reuniaun Konsellu Ministru,  Kuarta (01/07/2026).

Membru Governu ne’e afirma kona-bá internet atu garante iha teritóriu nasionál sira ne’e, operadór sira mak sei hatene no halo esplikasaun.

“Husu ba operadór sira sosa iha Kabu Timor-Leste, Empreza Públika depois sira fornese ba komunidade sira, pergunta katak ba  servisu estadu nia ha’u responde dehan sim, tanba ne’e Ministériu mak sei responsabiliza, maibé kona-bá komunidade ein-jerál ne’e operadór sira no Provedór Servisu Internet (ISP/Internet Service Provider) sira,” nia tenik.

Nia esplika  operadór tolu ne’ebé sei sosa liña internet Kabu  Sub-Marinu Fibra Óptika mak hanesan Timor Telecom, Telemor,  Telkomsel no ICP (Internet Computer Protocol).

Kona-bá nesesidade liña internet ba instituisaun estadu sira liu-liu liña Ministériu sira, Miguel Manetelu argumenta katak MTK sei fornese liña internet Kabu  Sub-Marinu Fibra Óptika ho  gratuita hodi fasilita serbisu ho kualidade atu kontribui ba fortalesimentu instituisaun estadu nian ho kualidade.

“Desede tinan 2024 iha komité revizaun orsamentu, ha’u husu    para orsamentu internet ba kada Ministériu sira ne’e sé bele hasai tiha tanba MTK mak fornese internet,” nia subliña.

Jornalista : Zita Menezes/Editór: Vito Salvadór