MPRM Asina Kontratu ho FUGRO Singapura Kona-bá Survey Jeofízika Pipeline husi Greater Sunrise no Bayu Undang Mai Natarbora

Ministru Petróleu no Rekursus Minerais (MPRM), Francisco da Costa Monteiro asina akordu ho Regional Business Line Director Marine Site Characterization APAC, Safri Drahman kona-bá survey jeofízika pipeline husi Greater Sunrise no Bayu Undang mai Natarbora atu asegura kadoras ne’e mai duni Timor-Leste, Sesta 17 Jullu 2026.

Díli, 17 Jullu 2026 (RAFA.TL)- Ministériu Petróleu no Rekursus Minerais (MPRM)  asina Kontratu ho empreza FUGRO husi Singapura kona-bá survey jeofízika pipeline husi Greater Sunrise no Bayu Undang mai Natarbora atu asegura kadoras ne’e mai duni Timor-Leste.

Governu Timor-Leste liu husi Ministériu Petróleu no Rekursus Minerais, ho haksolok asina kontratu ho Fugro Singapore Marine Pte Ltd ba levantamentu Jeofíziku no 2D sísmiku ho alta rezolusaun (2D High Resolution Seismic 2D – HRS) ba exportasaun gazodutu gás Greater Sunrise, husi komponente krítiku ba projetu TLNG.

Exportasaun gazodutu gás sei liga kampu Greater Sunrise ba Timor-Leste, hodi fornese enerjia Ne’ebé apoia projetu TLNG no kria oportunidade ekonómika ne’ebe dura ba Timor-Leste.

Ministru Petróleu no Rekursus Minerais (MPRM), Francisco da Costa Monteiro hatete lavantamentu ne’e reprezenta programa tékniku ne’ebé krusiál ba exportasaun Gazodutu Gás husi Greater Sunrise.

Dadus husi levantamentu ne’e fornese infromasaun detallu kona-bá tasi okos no sub-suprefísie ne’ebé kle’an, presiza atu optimaliza rota gazodutu, apoia dezeñu enjeñaria no asegura dezenvolvimentu gazodutu ho seguru, efisiente no tuir padran Internasionál.

Levantamentu ne’e sei mós identifika kondisaun tasi-okos no jeoperigu iha koridór gazodutu, hodi fornese fundasaun teknika ba etapa dezenvolvimentu gazodutu iha futuru.

‘’Ita kontrata kompañia ida naran FUGRO Singapura hanesan kompañia boot ida iha mundou ne’ebé iha espesialidade oi-oin, inklui espesialidade ba halo survey ida ema bolu dehan geophysical high resolution ne’ebé parte ida  husi estudu sira investigasoins ne’ebé nesesáriu atu bele estabelese rota kona-bá kadoras atu mai iha Natarbora husi Greater Sunrise  no mós Bay Undang,” Ministru Francisco da Costa Monteiro informa ba jornalista sira iha Farol, Sesta-ne’e.

Governante ne’e subliña kadoras rua ne’e atu permite Timor-Leste hodi aprofunda tan asuntu seluk ne’ebé atu kompleta investimentu sira ne’ebé sufisiente ba realizasaun kadoras no mos  Projetu Timor-Leste Liquefied Natural Gas( TLNG) mai Timor-Leste.

Investigasaun no levantamentu sira ne’ebé sei halo nesesáriu ba Timor-Leste no kompañia FUGRO iha asembleia, peritu xave sira iha área ne’e atu tuir no foti deklarasaun no informasaun sira-ne’e ba serbisu dezeñu enjeñaria no enjeñaria estranjeiru hotu-hotu.

Iha fatin hanesan, Regional Business Line Director Marine Site Characterization APAC, Safri Drahman informa sira nia parte hakarak hato’o obrigadu ba Governu Timor-Leste liu husi Ministériu Petroleu no Rekursu Minerais  ne’ebé fó ona konfiansa ba kompañia FUGRO hodi bele lori oin hodi halo planu atu lori sira nia  ró emblemátiku, Kubro Equator, mai Díli hodi halo mobilizasaun iha fatin ruma iha Outubru-Novembru

‘’Ami iha serteza katak ami bele fornese dadus ne’ebé di’ak tebes ba NPRM hodi kompleta ita-boot nia planu enjeñaria. Entaun obrigadu barak Ministru ba oportunidade,’ Safri Drahman hateten.

Safri Drahman haktuir, survey ida ne’e sei lori fulan tolu-resin bainhira  POGO ne’e bele ajuda projetu  pipeline kanuno  gás, fornese rezultadu sira lalais. Tanba POGO maka métodu fura no sukat rai iha tasi-okos  (pogo-style geotechnical survey) ne’ebé kompañia  FUGRO uza hodi foti dadus ho lalais tebes no hamenus kusto operasaun ró nian.

Jornalista: Remigia Locatelli/Editór: Vito Salvadór