Ouvir RAFA Ritmo, Voz e Coração de Timor
Díli, 27 Outubru 2026 (RAFA)— Prokuradór Jerál Repúblika, Nolson de Carvalho, konfirma katak parte Ministériu Públiku (MP) ho Polísia Sientifiku Investigasaun Kriminál (PCIC) fahe tarefa servisu investigasaun ba kazu korrupsaun sira.
Besik tinan ona mak PGR Nelson de Carvalho avoka (foti fila-fali) investigasaun kazu korrupsaun sira iha Komisaun Anti-Korrupsaun (CAC). Nune’e, to’o ohin loron, CAC la halo investigasaun ba kazu sira ho natureza korrupsaun tanba la hetan delegasaun husi MP hanesan na’in ba asaun penál.
Prokuradór Nelson de Carvalho hateten kazu korrupsaun sira ne’ebé Ministériu Públiku foti hotu husi CAC, balu delega iha PCIC no balu nafatin iha prokuradór titulár sira hodi hala’o investigasaun.
“Prokuradór sira rasik mak kaer titulár prosesu sira no ofisiál justisa rasik ajuda mós halo delegasaun bá PCIC,” PGR Nelson Carvalho informa hodi responde jornalista sira iha Díli, Tersa-ne’e.
Prokuradór Jerál Repúblika, esklarese katak avokasaun ne’e la’ós tanba nia problema ho Komisáriu CAC Rui Pereira dos Santos, tanba ne’e nia husu bá sosiedade tomak atu labele hamosu dúvida bá kestaun avokasaun ne’e.
Nia hatete, prosesu avokasaun inkéritu investigasaun ba kazu korrupsaun sira iha CAC, Ministériu Públiku avoka tanba bazea ba tramitasaun lei ne’ebé fó dalan ba MP nu’udar na’in ba asaun penál.
Nia afirma, kestaun avokasaun ne’ebé hamosu polémika no sai preokupasaun públiku kona-bá atu kombate korrupsaun, nia hato’o ona ba prezidente Parlamentu Nasionál.
Nia husu ba dirijente sira iha CAC bainhira ko’alia kona-bá prosesu avokasaun ne’e tenke haree tuir tramitasaun (baze legál) no keta naran mehi no ko’alia hanesan ai-sasik, maibé tenke hatene regra ne’ebé fó kompetensia ba Ministériu Públiku.
Antes ne’e Komisáriu Komisaun Anti Koporupsan (CAC), Rui Pereira dos Santos, hateten prosesu inkéritu hotu ne’ebé Komisaun Anti Korrupsaun durante inisia iha prosesu investigasaun, to’o agora seidauk simu fali delegasaun kompetensia husi Ministériu Públiku.
Fó hanoin fali katak, iha loron 03 fulan-Fevereru liubá, Prokuradór-Jerál Repúblika, Nelson de Carvalho, hasai despaisu ida hodi oriente Prokuradór Repúblika hotu-hotu atu avoka fali prosesu inkéritu sira ne’ebé antes delega ona bá Komisaun Anti-Korrupsaun (CAC)
Despaisu ho númeru 14/PGR/II/2026, Prokuradór Repúblika sira hetan orientasaun atu halo avokasaun prosesu sira iha prazu másimu loron lima (5), hodi garante katak prosesu investigasaun hotu fila-fali ba kontrolu Ministériu Públiku.
Jornalista: Marcelino Tomae
Written by: RafaFM
MP ho PCIC Fahe Tarefa Halo Investigasaun Bá Kazu Sira ho Natureza Korrupsaun
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt